Argazkiak: Chris Gomez Dominguez
Pozik daude Amurrio Trail Taldeko kideak igandeko lasterketak izandako harrerarekin. Goizeko hamarretan abiatu ziren 204 korrikalariak Juan Urrutia plazatik, eta Burubio eta Babio artetik ibili ziren lasterka, herrigunera itzultzeko gero.
Antolatzaileek aitortu dute eguraldia apur bat “tristea” izan zela, euri apur bat egin zuelako, baina ez zela txarra izan menditik korrika aritzeko, ez zuelako ez hotzik ezta haizerik egin. “Jendeak disfrutatu du lokatzaz eta mendiaz. Parte hartzaileek gustura amaitu dute, ez da ezer larririk gertatu eta dena joan da ondo”, azaldu dio Axier Vivancok Aiaraldea Komunikabideari.
Trail taldeko presidentearen ustez, hori da garrantzitsuena: jendea pozik itzultzea etxera. Eta lortu dutela dirudi: “Jendeak esan du pila bat disfrutatu duela, eta datorren urteko lasterketan pentsatzeari ekin diogu pixkanaka”.
Berrikuntza ugari
Vivancok nabarmendu duenez, hainbat berrikuntza txertatu dituzte aurtengo lasterketan. Ibilbidearena izan da begien bistakoena, albo batera utzi baitute aurreko edizioetako eskema, bide berriak osatuz Burubio eta Babio ingurutik.
Horrez gain, Ipar Martxa ere antolatu dute aurten lehenbizikoz. “81 partaide egon dira eta disfrutatu egin dute prestatu dugun ibilbideaz”, azaldu du Vivancok.
Ibilbide berria estreinatu dute aurten, Ipar Martxa egin dute lehenbizikoz eta plastikoa erabiltzeari utzi diote seinalizazioan eta hornilekuetan
Baina egon da beste berrikuntza bat ere; horren agerikoa izan ez arren, garrantzi handikoa izan dena. Amurrio Trail Lasterketa “Etiketa berdea” proiektuan sartu zen iaz. Hori dela eta, hainbat aldaketa txertatu dituzte aurtengo edizioan: jarri dituzten seinale guztiak izan dira berrerabilgarriak, eta plastikozko edalontziak banatzeari ere utzi diote hornilekuetan, parte hartzaileei euren katilu propioak eramateko eskatuz.
Modu horretan, “lasterketa jasangarriak” antolatzea dute helburu, “ingurunea zaintzen dutenak eta masiboak ez direnak”.
Eskualdeko kirolariak podiumean
Emaitzei dagokienez, Aiaraldeko korrikalariek eman zuten zeresana igandeko zitan. Pello Moreno Martin laudioarra bigarren geratu zen trail luzeko gizonezkoen kategorian, eta Iñaki Isasi Flores aiararra hirugarren helmugaratu zen kategoria berdinean (gainera, kontuan hartu behar da Isasik aurreko egunean Aiara BTT Marathonen ere gailentzea lortu zuela). Lasterketa txikian, aldiz, Amurrioko Trail Taldeko Ana Ibarra Velar sailkatu zen bigarren.
Ipar Martxan, aldiz, Izaskun Bengoa amurrioarra iritsi zen metara lehena emakume federatuen artean.
Hemen ikusi daitezke kategoria guztietako lehen hiru sailkatuak:
TRAIL LUZEA (22 kilometro)
Gizonak
1. Mestafa Mahfoud
2. Pello Moreno Martin
3. Iñaki Isasi Flores
Emakumeak
1. Ania Hernandez Gonzalez
2. Lola Oiarzabal
3. Lucia Garate Echenique
TRAIL TXIKIA (12,5 kilometro)
Gizonak
1. Eneko Mariño Apezteguia
2. Oier Kareaga Laka
3. Aner Zuluaga Intxaurbe
Emakumeak
1. Fatima Urigüen Abrisqueta
2. Ana Ibarra Velar
3. Mariñe Izaola Arenas
IPAR MARTXA FEDERATUAK
Gizonak
1. Pedro Romero Delgado
2. Ramontxo Arandia Goldaracena
3. Jon Mendrano Ruiz
Emakumeak
1. Izaskun Bengoa Perez
2. Arantza Astirraga Muruamendiaraz
3. Maria Victoria Landa San Martin
IPAR MARTXA OPEN
Gizonak
1. Arkaitz Vidal
2. Antonio Cobo
3. Gerard Gibaja
Emakumeak
1. Beatriz Imas Zudaire
2. Sonia De La Fuente
3. Pilar Lopez Santamaria