Amurrioko EH Bilduk ohar bidez azaldu duenez, mozio baten bitartez Amurrioko Udalari zortzi hilabeteko epean txabolak eraikitzeko ordenantza bat egin dezan eskatu dio. Amurrio, administrazio-batzarrekin batera, nekazaritza eta abeltzaintza jarduera ugari dituen ingurune naturala da.
Koalizioaren arabera, herrian badaude landa inguruneaz gozatzen duten eta lurzoru urbanizaezinak beren aisialdirako eta ongizaterako erabiltzen dituzten bizilagunak, baina modu ez profesionalizatuan. Adibidez, lurraren luberritzea laborantza ezberdinetarako edo animalia txikiak hazteko.
Txabolak behin-behineko eraikin txikiak dira eta nekazaritzako zereginetan lanabesak gordetzeko laguntzen dute. Gainera, nekazaritzarako erabilgarriak dira eta etxeko animalia txikiak edo baserriko animaliak gorde daitezke. “Profesionalizatu gabeko nekazaritza jarduerak, arazoak izaten ditu nekazaritzarako lanabesak gordetzeko edo animalia horiei babesa emateko. Kasu gehienetan, indarrean dagoen araudiak ez dituelako onartzen, nekazari ez profesionalak ere babestea garrantzitsua dela uste dugu.” dio EH Bilduk.
Txabolak eraikitzeko baimena izatea garrantzitsua da, baina eraikuntza hauek irizpide espezifiko batzuk izan behar dituztela argudiatu dute. “Ordenantza honen bitartez arazo hau konponduko litzateke eta legearen barruan eraikiko lirateke”.