Lan Arloko 3. zenbakiko Epaitegiak berriki adierazi du bere iritzia Beharra enpresako hiru langilek egindako salaketaren harira, zeinean exijitzen zuten Amurrioko Udalarekin duten lan harremana aitortzea, hainbat urtez autonomo faltsuak izan direlako.
Izan ere, hiru behargin horiek aspaldidanik egiten dute lan Reforren, udal frontoian eta Mendiko Eskolan (batek 1992tik, eta besteek 2017tik eta 2018tik), Udalak azpikontratuta. Epaileak arrazoia eman die langileei partzialki eta frogatutzat eman du erakundearen eta Beharra enpresako kideen artean lan harremana zegoela. Halaber, adierazi du lan bera egiten duten udal beharginen baldintzak (soldata eta kategoria) izan beharko luketela.
Epaileak ez du onartu oinarrizko eskubideak urratu direnik, baina atea irekirik utzi du hiru salatzaileek kalte-ordainak exijitu ditzaten.
Amurrioko Udalak, bere aldetik, oharra zabaldu du aipatzeko ez dagoela ados epaiarekin, baina beteko duela. Dena den, tokiko erakundeak honakoa azpimarratu du: "Ebazpen judizialak argi eta garbi ezartzen du langileak ez direla Udaleko langile finkoak, mugagabe ez-finkoak baizik".
Hortaz, hau ondorioztatu du Udalak: "funtzio publikora sartzean berdintasun-, merezimendu- eta gaitasun-eskubideak errespetatzen direla bermatzeko, lanpostuetarako legezko deialdia egin beharko da, lan-eskaintza publiko baten bidez".