Aste honetan Lan Arloko 3. zenbakiko Epaitegiak ebatzi du Beharra enpresako langileak -Mendiko Eskolako, frontoiko eta Reforreko kirol azpiegituren mantenuko arduradunak- "autonomo faltsu" gisa lan egiten dutela Amurrioko Udalarentzat.
Gaur tokiko erakundean ordezkaritza duten sindikatuek oharra plazaratu dute adierazteko mugarri bat dela epaia lan harremanei eta eskubideei dagokienez. Antolakundeen ustez, epaileek azaleratu dute iruzurrezko kontratazioaren arazoa Udalean.
Oharrak adierazi du epaileek berretsi dutela beharginek eta Udalak lan harreman formala zutela, ez zirela azpikontratatutako autonomo hutsak: "Aitorpen horrek esan nahi du langileek eskubidea dutela lan-legeriak ezarritako babes neurriak eta onurak jasotzeko, hala nola gizarte-segurantza, ordaindutako oporrak eta langile formalei aplikatzen zaizkien beste lan-eskubide batzuk".
Halaber, LABek, ELAk eta ESANek begi onez ikusi dute langile mugagabe ez-finko gisa sailkatu izana epaitegiak: "Epaiaren funtsezko puntuetako bat da langileak mugagabe ez-finkoak direla aitortzea eta pertsona bakoitzaren antzinatasuna errespetatzea (32, 7 eta 6 urte,
hurrenez hurren). Izendapen horrek, langile finko bihurtzen ez baditu ere, lehen ez zuten lan-egonkortasuna ematen die. Urrats hori funtsezkoa da langileek beren lanbide-kategoriarekin bat datorren konpentsazio justua jasoko dutela bermatzeko".
Amurrioko Udalaren onarpena
Gainera, epaileen beste gako bat izan da orain arteko lan harremana iruzurtzat jo dutela eta LAB, ELA eta ESANen arabera, Amurrioko Udalak helegitea jarri ez izana bada arazo hori onartzeko modu bat, baina ez dela nahikoa ere uste dute: "Erantzukizunaren onarpen gisa interpreta badaiteke ere, egoera hau pairatu duten langileen lan-
egoera konpontzeko eta erregularizatzeko bidean, aurrerapausoak emateko premia ere islatzen du, baita udal kontratazio publikoan egon litekeen edozein irregulartasun berrikusteko eta zuzentzeko premia ere".
Azkenik, langileekiko hartu beharreko neurriak azpimarratu dituzte: "Epaiak azpimarratzen du langileei beren lanbide-kategoriaren arabera ordaindu behar zaiela, eta antzeko eginkizunak dituzten beste udal-langile batzuen soldata baliokidea jaso behar dutela. Puntu horrek soldata-ekitatearen eta egindako lanaren bidezko aitorpenaren garrantzia nabarmentzen du. Langileek, laneko segurtasuna ez ezik, bidezko ordainsaria ere merezi dute, beren erantzukizun eta
trebetasunekin bat datorrena".