Zein da jaietako egunik onena?
Niretzat jaietako egunik onena 14a da, Kuadrillen Eguna. Beti primeran pasatzen dut egun horretan, batez ere kuadrilla guztiekin egiten den bazkarian, baina txupinazoa eta karrozen eguna ere gogo handiz espero ditudan egunak dira.
Egitarauko zer ekintzetarako zaude gogotsuen?
Niretzat aurten goitibeherak, hainbat urte pasa baitira ekintza hau ospatu gabe. Amak kontatu dizkidan pasadizoei esker, itxaropen handia dut ekintza honi dagokionez. Gogo handia dut aurten nola doan ikusteko, ea irabazten dugun.
Zergatik erabaki zenuen El Boli kuadrillan sartzea?
Kuadrilla honetan sartu nintzen jende berria ezagutzeko eta karroza eta jaietan modu aktiboagoan parte hartzeko gogo handia nuelako. Gainera, lagun bat nuen kuadrillan, beraz, errazagoa izan zen. Aukeraketa hori egokia izan da, jendea bikaina da eta oso giro ona dago kuadrillako guztion artean. Ezin ninteke harroago egon haiek ordezkatu ahal izateaz.
Zeri buruzkoa izango da aurten zuen karroza? Zergatik gai hori?
Gure aurtengo gaia zirkua da. Kuadrilla guztiek bezala, jende guztiak bere ideiak aurkezteko eta gustukoen zuena bozkatzeko deia egin zen aspaldi. Greziar gaiekin karroza egiteko zorian egon ginen, baina erabaki genuen zirku bat egiteak aukera gehiago ematen zizkigula dekorazio polit bat egiteko eta jende gehiagok parte hartzeko.
Zein uste duzu izango dela txosnetan gehien entzungo den abestia?
Nik uste dut Lokaleko leihotik izango dela jai hauetan gehien entzungo dugun abestietako bat.
Zerk egiten ditu Amurrioko jaiak berezi?
Niretzat, Amurrioko jaietako gauzarik bereziena kuadrillak dira. Kuadrillen arteko hizka-mizkak, antolatzen diren ekintzak, kuadrillen bazkariak, jendea, karrozak taldean muntatzea...
Horrek guztiak jaiak beste era batera bizitzea eragiten du. Kuadrilla bateko kide sentitzeak eta bestela ezagutuko ez zenukeen jendearekin hitz egiteak eta lan egiteak herriaren eta jaiaren beraren parte sentitzen laguntzen dizu. Kuadrillak gure artean laguntzeko gaudela esateko ere aprobetxatu nahi nuke, eta erasoren bat gertatzen bada, hemen gaudela laguntzeko, behar izanez gero.