Hona hemen Luken Alavari egindako elkarrizketa:
Zein da jaietako egunik onena?
Nire jaietako egunik gogokoena kuadrillena da, uste dudalako egun egokiena dela kuadrillarekin egon eta egun osoaz gozatzeko.
Egitarauko zer ekintzetarako zaude gogotsuen?
Jaietatik ilusio gehien egiten didana ez da egitarauan egon daitekeen ekintza zehatz bat, baizik eta egun osoa egon ahal izatea kanpoan, lagunekin.
Zergatik erabaki zenuen Herriarenak kuadrillan sartzea?
Uste dut kuadrilla barruan dagoen giro osasuntsu eta politagatik. Uste dut elkarlan handia sortzen dela kuadrilla barruan eta ekintza guztiak egiten direla guztien artean. Denon presentzia da garrantzitsua eta, alde horretatik, oso talde polita da. Horrez gain, iruditzen zait kuadrilla honek ekarpen oso garrantzitsuak egiten dituela bai herriaren alde eta baita, kasu honetan, jaien alde, Jai Herrikoien aldeko egitaraua betetzen, adibidez.
Zeri buruzkoa izango da aurten zuen karroza?
Gure aurtengo gurdia itsasontzi bat izango da, eta horrekin transmititu nahi dugun mezua da euskararen alde arraun edo boga egin nahi dugula. Gure helbururik garrantzitsuena izango da Aiaraldea Komunikabideak euskararen alde egiten duen ekarpena nabarmentzea.
Zein uste duzu izango dela txosnetan gehien entzungo den abestia?
Espero dut Potra salvaje ez izatea (barreak), jada nahiko nekatua bainago abesti horretaz. Belgorriko kide izanda ilusio handia egingo lidake txosnetan gure taldeko abestiren bat entzun ahal izatea, Neguko Otsoak kasu.
Zerk egiten ditu Amurrioko jaiak berezi?
Urtean behin sortzen dela aitzakia egunerokoan ikusten ez dituzun pertsona askorekin topatzeko. Gainera, jaietako giro horretan beti daude hainbat ekintza adin guztientzat, eta uste dut badela astebete zeinetan herri guztia kalean dagoen eta harreman osasuntsuan sortzen diren adin ezberdinetako pertsonen artean.