Amurrioko kanpai-joleek egun bizia izango dute bihar. Izan ere, euren kontzertuaren XX. edizioa antolatu dute eta laguntza ez zaie faltako hitzordua erakargarria izan dadin.
Ospakizunak 10:00etan hasiko dira eta kanpaien iraulketak ez du etenik izango bost minutuz. Horrekin iragarriko dute jaia. 11:00etarako hildako kideen omenezko meza deitu dute eta 11:50ak aldera Bakearen Nazioarteko Egunaren harira sortu den egitasmoarekin bat egin eta kanpaiak joko dituzte. Bakearen aldeko egitasmoa gaur bertan hasiko da Melbournen eta ideia da 24 ordutan mundu osoan jotzea kanpaiak etenik gabe.
12:00etan, aldiz, tutu-formako kanpaien kontzertua eskainiko dute Amurrioko Musika Eskolako kideek. Jose Luis Albizua antolatzaileak adierazi du kontzertu interesgarria eta tradizionala izango dela, baina, halaber, iragarri du zerbait berritzailea nahiago dutenek karilloi emanaldia izango dutela 13:00etan.
Ordu horretan bi adituk sortuko dute musika eta, ohiko abestiekin batera, ezagunagoak diren doinu pop eta modernoak joko dituzte. "Ez dakigu zein abesti hautatuko dituzten, baina guk adierazi diegu kanta ezagunak izan behar direla. Izan daitezke euskal kantak edo irratian ospetsuak egin direnak. Zortzi izango dira guztira", aurreratu du Albizuak.
Mokadua ere eskainiko dute. Azkenik, 15:00etan kanpai-joleen anaitasun bazkaria egingo dute.