Ikerketa bat abiatuko du Amurrioko Udaleko Gizarte Ekintza eta Osasun Sailak udalerriko gazteen artean ludopatia sintomak detektatzeko. Zehazki, kirolean aritzen diren gazteen kirol-apustuekin duten harremana izango dute aztergai, eta kirol elkarteekin elkarlanean arituko dira horretarako.
Programa bat garatuko du tokiko erakundeak, “kirol-apustuen erabilera desegokiaren ondoriozko arazoak ikertzeko, kontzientziatzeko eta murrizteko, bai eta mendekotasun horretatik edo beste batzuetatik babesteko tresnak garatzeko ere”.
Udalak nabarmendu du geroz eta jende gazteagoak egiten dituela apustuak. “Adingabeen %20k baino gehiagok ezagutzen eta egin dituzte apustuak noizbait”, ohartarazi dute, eta nabarmendu dute arriskuak “esponentzialki areagotzen” direla online inguruetan. “Gazteak dira ahulenak eta ausazko jokoen nahasmenduaren eraginpean daudenak, garapen emozional eta kognitiboaren etapa betean daudelako”.
Kirola "arrisku faktore"
Horri lotuta, Udalak nabarmendu du ludopatiaren kasuan kirola egitea “arrisku-faktore” bilakatu daitekeela, jokalariek “kontrol-sentsazioa” dutelako eta bide asko dituztelako apustuak egiteko, “irabaztea erraza iruditzen baitzaie”.
Behin datuak bilduta, hainbat tailer eskainiko ditu Udalak, “kontzientziazioan eta murrizketan lan egiten jarraitzeko”. Izan ere, tokiko erakundearen hitzetan, “funtsezkoa” da “gazteek, haien senideek eta kirol-eragileek” informazioa jasotzea “ludopatía hautemateko moduari buruz”.
