M.L. izeneko 47 urteko langile urduñarra zendu da gaur Loiuko GECSA Conductores y Conexiones Especiales S.A. enpresan. ELA sindikatuak azaldu duenez, hildako beharginak Amurrioko Amiantec 3000 enpresarentzat egiten zuen lan, eta altuerako lanak egiten zebilen Loiuko lantegian, teilatutik erori denean. Hain zuzen, amiantoa kentzen duen enpresa da Amiantec 3000, eta gisa horretako lanak egiten ditu minbizia eragiten duen mineral hori duten fabrika zein bestelako azpiegituretan.
LAB sindikatuak baieztatu du Urduñako langilea amiantoa kentzeko lanetan ari zela Gecsa enpresan, eta atzo bertan lan horien inguruan galdetu ziotela sindikatuko delegatuek lantegiko zuzendaritzari, baina honek uko egin ziola inolako daturik emateari. Nabarmendu dutenez, langilea 9 metroko altueratik erori da. Azken 10 urteetan Euskal Herrian 81 pertsonek galdu dute bizia antzeko erorketen ondorioz, 8 guztira aurten. Gainera, 2020an horrelako istripua jazo zen Zorroza Gestión de Residuos enpresan, Murgan. Bassirou Dione gaztea zendu zen eta lau urte geroago, konpainiako arduradunek onartu zuten gorpua mugitu zutela gertatutakoa estaltzeko.
Beste heriotza bat Nafarroan
Gesca enpresako zuzendaritzak desamiantatze lanei buruzko informazioa ukatu zien atzo bertan langile ordezkariei, LABek salatu duenez
Izan ere, gaur bertan antzeko beste lan heriotza bat jazo da Nafarroako Olleta herrian, telefonia poste zahar batean kobrea kentzen ari zen langile bat bertatik erori denean. Hala salatu du LABek: "Kasu hauetan Movistarrek ez ditu altueretarako saskidun kamioi egokiak erabiltzen kostuak gutxitzeko, eta berriki hainbat zigor jaso ditu neurriak ez hartzeagatik. Dirudienez, merkeagoa zaie langilearen heriotza".
ELAk nabarmendu du aurten 46 pertsonak galdu dutela bizia euren lanpostuetan Hego Euskal Herrian, eta lurralde honek "lan-istripuetan buru" izaten jarraitzen duela Espainiako Estatuan. Horri lotuta, sindikatuak azaldu du altuerako lanetan gertatzen diren erorketak direla "istripu hilgarrien arrazoi nagusietako bat", eta heriotza horiek "guztiz" saihestu daitezkeela, "oinarrizko segurtasun neurriak hartuz gero".
Horregatik, lan heriotza hau "ikertu eta argitzea" eskatu du langile-erakundeak, eta baita atzetik egon daitezkeen erantzunkizunak onartzea ere. Horri lotuta, ELAk zein LABek eskatu dute laneko arriskuen prebentzioari lotutako legea "bere osotasunean" betetzea, eta erakunde publikoei exijitu diete baliabide gehiago bideratzea ikuskikaritzak egitera, legea betetzen dela bermatu eta horrelako albisteak ekiditeko.
Urduñako Udalak, bere aldetik, doluminak helarazi dizkie hildakoaren senide eta lagunei.