Azaroaren 3an egingo dute eskualdeko mendi ibilaldirik sonatuena: Gorobel Ibilaldia. Aurtengoa XXXVIII. edizioa izango da, eta Mendiko Lagunak taldeko kideak hilabeteak daramatzate buru-belarri honen antolakuntzan.
Frailebururen mendeurrena
Aurtengo edizioak bat egin du Gorobel mendilerroko Fraileburu mendira egindako lehenengo igoeraren mendeurrenarekin. Angel Sopeña alpinistak 1924ko martxoaren 16an eskalatu zuen haitz ezaguna lehenengo aldiz, Euskal Herriko lehenengo eskalada bidea sinatuz, euskal mendizaletasunaren historian mugarria ezarrita.
Mendiko Lagunakeko kideek eskalada entzutetsu horren efemeridea ospatzea erabaki dute. Hori dela eta, Gorobel Ibilaldiko bi ibilbide nagusiek fraide itxura duen haitza ezaguna inguratuko dute. Horrez gain, Frailebururen silueta presente egongo da ibilaldiko parte-hartzaileek jasoko dituzten oroigarrietan.
Hiru ibilbide
Ohikoan bezala, hiru ibilbide prestatu dituzte antolatzaileek, adin eta maila guztietako mendizaleen gozamenerako. Gorobel Ibilaldiak 36 kilometroko luzera izango du. Amurriotik abiatuko da goizeko 7:00etan, eta Burubio, Atxondo, Txarlazo, Txolope edota Bedarbide tontorrak zeharkatuko ditu. Goizale aterpean atsedena hartu ostean, Sendanegratik beherako bidea hartuko dute mendizaleek, Amurrioraino.
Ibilaldi ertainak 25 kilometroko luzera izango du. Bertan parte hartuko duten mendizaleek Urduñatik ekingo diote ibiltzeari, eta martxa nagusiko ibilbide berdina jarraituko dute.
Azkenik ibilbide txikiak mendizale gazteenak elkartuko ditu 10:00etan. Hauek, Goikolandeta izango dute abiapuntu, eta Lendoñogoiti eta Mendeika artean arituko dira ibilian, Amurriora jaitsi aurretik.
Bi izen emateren zozketa
Dagoeneko irekita dago Internet bidezko izen ematea. Mendiko Lagunakeko kideek azaldu dutenez honezkero 900 izen emateak gainditu dituzte.
Aiaraldea Komunikabideak, Mendiko Lagunak taldearekin lankidetzan, Gorobel ibilaldian parte-hartzeko bi izen emate zozkatuko ditu. Parte hartu zozketan hemen.
