Pasa den astean haizetearen ostean deialdia bertan behera utzi eta gero, Amurrioko Nagusien Kontseiluak gaur egingo du batzarra 18:00etan Nagusien Etxean. Topaketaren helburua izango da egiten dutena jakinaraztea. "Ekimen ugari antolatzen ditugu eta nahi dugu jendeak jakitea. Batzuk oso garrantzitsuak dira. Adibidez, etxean eta bakardade egoeran daudenentzako jantokia, Nagusien Etxean eskaintzen dena eta zeinean hamabost bat lagunek parte hartzen duten", azaldu du Patri Aldamak.
Dena den, kontseilua irekita dago egoera anitzetan dauden herritarrei. "Sasoian daudenentzat ibilaldiak antolatzen ditugu, baita zineforumak ere. Nagusien egoitzan ere bingoak prestatzen ditugu. 25 lagun inguru gara eta guztiok ez dugu ekintza orotan parte hartzen", nabarmendu du Aldamak.
Kontseiluaren jarduera interesgarritzat jotzen dutenek badute aukera Udalera deitzeko eta Ane Izquierdorekin harremanetan jartzeko, bera baita idazkaria. Beraren bidez parte har daiteke jardueretan.
5 urteko ibilbidea
Nagusien Kontseiluaren kimua pentsiodunen asteleheneko kontzentrazioetan sortu zen. Hasieran, euren kabuz prestatu zituzten ekintzak, bidaiak, esaterako. Geroago, ofizialki eratu ziren eta duela bi urte tokiko erakundearen barruan ere lan egiten dute, Nagusilan bezalako ekimenetan.
Ekimenaren sustatzaileen ustez, oso positiboa da kontseiluaren eragina eta espero dute inguruko herriak (Laudio, kasu) kutsatzea eta eurena abiatzea.