Gaur goizean aurkeztu dute udaletxean Denok gara norbait erakusketa. Berez, osatzen duten hiru argazkiak duela astebete jarri zituzten, baina gaur erakutsi dituzte osorik, 'Denok gara norbait' eta 'Todas somos alguien' mezuekin.
Proiektuaren atzean Maied Urrutia dago, eta argazkien egileak Bruna Aldama, Ainara Robles eta Iratxe Rotella izan dira. Hirurak dira Urrutiaren ikasleak Kultura Etxeko argazkigintza ikastaroetan.
Lehiaketa artistikoaren tokia
Proiektu honek Amurrion egiten zen Lehiaketa Artistikoaren tokia hartu du. Izan ere, Udalak azaldu duenez, "egitasmo horrek ez ditu tokiko artistak bultzatzen eta hemengo sortzaileak babestea da Kultura Planaren asmoa".
Abiapuntu horrekin, Kultura Arloak bestelako ekintza bat pentsatu zuen eta Maied Urrutia argazkigintza irakasleari proposatu zion erakusketa sortzea, neurri handikoa, kalean jartzeko.
Lehiaketa Artistikoaren tokia hartu du ekimen berriak tokiko sortzaileak sustatzeko asmoarekin.
Genero ikuspegia
Hasieran ideiak ez zuen genero ikuspegia berez txertatuta, baina Urrutiak hiru emakume argazkilari hautatu zituen antzeko begirada dutelako: "Sortzaile ezagunak gonbidatu izan bagenitu, agian ez litzateke posible proiektu erabat koherentea egitea, baina Bruna Aldama, Ainara Robles eta Iratxe Rotella aspaldi ezagutzen ditut eta badakit antzeko begirada dutela. Euren arteko elkarlana sustatu dut. Egun berean egin genituen irudi guztiak eta elkar lagundu zuten argiarekin, adibidez. Asmoa zen erakustea emakumezkook ez dugula lehiakortasun toxikorik".
Erretratuak
Hiru erretratu sortzea zen hasierako ideia, baina ez zuten zehaztu nor agertu behar zen. Edonola ere, ideia 'Denok gara norbait' izanik, Urrutiak proposatu zien hiru argazkilariei miresten zuten pertsona bana aukeratzea eta guztiek erabaki zuten emakumeak izatea.
"Guztiok gara norbait bizitza honetan. Proiekzio publiko handiagoa edo txikiagoa izan, gure inguruan eragiten dugu. Hortaz, jende oro da garrantzitsua", argitu du Urrutiak.
Erantzunak
Argazkiak duela astebete instalatu zituzten udaletxean, Kultura etxean eta liburutegian. Geroztik, herritarren artean jakin-mina, ezustea eta erantzun anitzak eragin dituzte. "Batzuek aipatu dute ea zergatik zegoen emakume hau edo bestea. Ea zergatik eurak eta ez beste batzuk", azaldu dute.
"Orain mezua zabaldu dugula, espero dugu jendeak zuen iritzia alderatzea eta aldatzea eta zerbait sortzea bere baitan", aldarrikatu du Maied Urrutiak.