Kuskua elkarte soziokulturalaren eskutik ekitaldi solidario bat egingo da azaroaren 29an Valentziako uholdeek kaltetutako pertsonentzat dirua biltzeko. Arratsaldeko zortzietan izango da zita Amurrioko San Jose parrokian. Bildutakoa Caritas Amurrioren bitartez iritsiko da Valentziara, erakunde hori izan baita ekitaldia egiteko lekua utzi duena.
Ekitaldian herriko hainbat elkarte zein norbanakok parte hartuko dute, eta abestu, dantzatu, magia egin, instrumenturen bat jo, errezitatu, antzeztu... egin ahalko dute, bakoitzak nahi duena.
Parrokiako sarrera doakoa izango da, eta dohaintzak bertan dauden itsulapiko batzuetan zuzenean aurkeztu ahal izango dira, edo, bestela, tonbola solidario batean txartelak erosita. Tonbola hori ere parrokian bertan egongo da, eta eskuragarri egongo da emanaldietan zehar.
Parte hartu nahi duenak bi modu ditu horretarako: ekitaldian zehar jardutea edo tonbola solidariorako dohaintza egitea (zerbait materiala edo zerbitzuren bat izan daiteke). Interesdunak Kuskua elkartearekin harremanetan jar daitezke sare sozialen bidez.