Amurrioko Tokiko Merkataritzaren Egunaren lehen edizioa aurkeztu dute gaur Amurrioko udaletxeko areto nagusian. Amurrio Berrikusi elkarteak jarduera sorta prestatu du, "herritarren eta tokiko merkataritzaren arteko distantzia murrizteko".
Amurrio Berrikusi aplikazioa
Tokiko merkataritza sustatzeko bide horretan, Amurrio Berrikusi aplikazioaren inplementazioan egindako lana jarri dute balioan Udaleko eta merkataritza elkarteko kideek. Sakelako telefonoetarako aplikazio digitalak 1.900 deskarga baino gehiago izan ditu aurkeztu zenetik, eta nabarmen gainditu ditu hasierako aurreikuspenak.
Guztira 8.844 tiket balioztatu dira aplikazioa erabiliz, horretarako garatu diren bi kanpainen artean. 592.627,59 euroko balioa dute tiket guztiek orotara.
Tokiko merkataritza sustatzeko egitasmoak
Asko dira azken asteetan tokiko merkataritza sustatzeko abian jarritako egitasmoak. Horien artean dago Tokiko Saltokiak Eguneratzeko Programa. Udalerriko 20 negoziok hartu dute parte bertan eta, guztira, 435 bizilagunen iritziak jaso dituzte tokiko merkataritzarekin duten esperientzia eta harremanari buruz.
Berritasun nagusia "kontsumitzaileen eta tokiko saltokien arteko harremana estutzeko" sortu duten podcast saio berria da. Amurrio, de tienda a tienda da saioaren izena, eta 15 minutuko sei atalez egongo da osatuta. Bertan, udalerriko hainbat merkatariren esperientziak elkarbanatuko dituzte. Gaurko aurkezpen ekitaldia baliatu dute lehen saioaren aurrerapena eskaintzeko. Azaldu dutenez, aurki egongo dira atal guztiak entzungai.
Datozen aste eta hilabeteetan askoz gehiago izango dira abian jarriko dituzten dinamikak: tailerrak, hitzaldiak... Arreta berezia jarri nahi du merkatarien elkarteak adinekoak eta gazteak erakartzen.
Sari banaketa
Gaurko aurkezpena baliatu dute ere azken kanpainetako sari banaketa egiteko. Zuk erantzun, Guk ikasi inkestaren bi irabazleek tokiko produktuz osatutakobi saski jaso dituzte, 100 eurotan baloratutakoak.
1.500 euroko bi txeke banatu dituzte ere, Udazkeneko Zozketako sariak hain zuzen ere. Azkenik, eta zozketa berdinean, 1.000 euroko saria irabazi du Bai-Bada liburudendak.
