Ska doinuak izango dira bihar protagonista Amurrioko Gaztexeko kontzertuetan. Gazte Asanbladako kideek jaialdi berria antolatu dute, eta oraingoan Les testarudes, Skabidean eta Fito Skins taldeak izango dira protagonistak.
21:00etan zabalduko dituzte espazio autogestionatuko ateak, eta sarrera borondatearen truke izango da. Apirilean Su Ta Gar talde ezagunak gaztetxea goraino bete zuenetik, bertan antolatzen den lehenengo musika jaialdia da honakoa, eta gazte amurrioarrak gogotsu azaldu dira hitzorduari heltzeko. "Ilusio handia egiten digu gure oholtzatik hain maila handiko taldeak izateak, zuekin dantzatzeko zain gaude!", adierazi dute sare sozialetan.
Ska doinuak nagusi
Kataluniatik dator bihar gaztetxean arituko den taldeetako bat, Les Testarudes. Bederatzi emakumek 2023an abiatutako proiektu musikala da honakoa. Ibilbide laburra egin duten arren, lortu dute honezkero panorama musikalean haien ska, rocksteady eta reggae doinuei lekua egitea.
Iruñeatik dator Skabidean, hauek ere ska, rocksteady eta reggae doinuekin. 2012. urtean sortu zen taldea, eta 10 urte baino gehiago daramate Euskal Herriko eszena musikala astintzen.
Ondo ezagutzen dituzte eskualdeko txokoak, izan ere, hainbatetan izan dira Laudioko Gaztetxean jotzen, besteak beste. Berriki taldearen estudioko bosgarren lan luzea kaleratu dute: Hau errepikaezina izan da, 17 abestiz osatutako diskoa:
Kartela osatzeko, Elorrioko Fito Skins taldearen doinu akustikoak ere igoko dira Amurrioko Gaztetxeko oholtzara.
Gaztetxea goxo eta prest
Azken asteetan buru-belarri aritu dira Amurrioko Gazte Asanbladako kideak espazioa atontzeko auzolanetan. Teilatu eta argiteria berriak jarri dituzte, eguraldia edozein dela ere Gaztetxean dantzan goxo etengabe aritzeko.
Bere unean jarritako karpari estalkiak gehitu dizkiote, euri urak bideratzeko kanalizazioekin batera. Eszenatokiko egitura sendotu dute ere.
