Sare sozialetan zabaldutako bilkurak arrakasta izan zuen atzo. Hogeita hamar bat lagun elkartu ziren Amurrioko Parkean, Ondasun Higiezinen Gaineko Zergaren (OHZ) igoeraren aurka protestatzeko. Patxi Castro amurrioarrak Facebookeko No eres de Amurrio orrian zabaldu zuen deialdia. "Jende gehiago elkartu zitekeen baina eguraldiak ez du laguntzen. Garrantzitsua da honen aurka mobilizatzea", adierazi zion Castrok Aiaraldea Komunikabideari elkarretaratzea hasi berritan.
"Ez gara antolakunde bat, herritar soilak gara. Gaiaren inguruan hitz egiten hasi eta zerbait egin behar genuela ondorioztatu genuen", adierazi du Patxi Castrok. "Jendeak OHZren igoeraren berri izatea nahi genuen, askotan oharkabean pasatzen baitira igoera hauek".
Elkarretaratzean salatu zutenez "Ondasun Higiezinen Gaineko Zerga %20 igo da herritar askorentzat". Igoera hori "lotsagarritzat" jo zuen Castrok: "Ez dute %5 igo, ez, %20 igo da. KPIaren igoeraren oso gainetik. Ez gaude igoera horrekin ados, eta Udalak azalpenak ematea nahi dugu".
Ekimen gehiago
Etorkizun hurbilean egingo dituzten ekimen eta mobilizazioen lehen urratsa izan zen atzoko bilkura. Patxi Castrok azaldutakoaren arabera, jendea entzun eta erabakiak adostea izan zuten helburu atzo.
Gaur bertan Castrok adierazi du sare sozialetan udalarekin jarri dela harremanetan eta alkatearen idazkariak iragarri diola ez dela berarekin bilduko.