Ikuskizuna prestatu dute Amaurre ikastetxeko Lehen Hezkuntzako ikasleek Gabonei hasiera emateko. Hain zuzen, Disney-Pixarren Coco filma ekarriko dute oholtzara bihar, abenduaren 13an, 15:30ean Amurrio Antzokian.
Ohar bidez azaldu dutenaren arabera, filmak balore unibertsal eta hunkigarriak eskaintzen ditu, "musikal batean lantzeko ezin hobeak direnak": familiaren garrantzia, tradizioekiko errespetua, ametsak jarraitzeko ausardia, eta oroitzapenen indarra. "Musikal honen bidez, gure ikasleek elkarlanean aritzeko aukera dute, emozioak ulertzen eta adierazten ikasiz, eta kultura-aniztasunaren aberastasuna ezagutuz", adierazi dute.
Gainera, hainbat onura eskaintzen dizkie, ikastetxearen hitzetan: sormena garatzea, autoestimua indartzea, talde-lanean eta komunikazioan trebatzea eta eszenatokian norberaren burua gainditzeko aukera ematea. "Cocoren mezua eta musika uztartuz, ikasleek esperientzia paregabea biziko dute, bai artistikoki eta baita pertsonalki ere", gaineratu dute.
Coco pelikula
Coco filmak Miguel izeneko mutiko mexikarraren istorio hunkigarria kontatzen du. Miguel gazteari, musikarako talentu handia duen arren, bere familiak debekatu dio musikarekin lotutako edozer.
Hala ere, Miguelen abentura musikala hasten da Hildakoen Munduan ustekabean sartzen denean, bere familiaren arbasoen sekretuak argituz eta bere ametsak jarraitzea zer den ulertuz.
