Amurrioko Juan Urrutia plaza berriro bete da indarkeria matxista salatzeko. Pasa den astean Irungo erailketaren ondorioz hartu behar izan zuten (bigarrena Euskal Herrian 2025ean) eta gaur herrian bertan jazotako erasoa dela medio. Izan ere, emakume bat kaletik paseatzen zebilela, gizon bat jarraika izan zuen masturbatzen ari zelarik.
Jende ugarik parte hartu du mobilizazioan, ez soilik herrikoak, eta adin anitzeko lagunak batu dira pankartaren atzean eta ingurutan.
Amurrioko Emakumeen* Sareak azpimarratu du pasa den asteko heriotzak islatzen duela matxismoaren muturreko adierazpena dela erailketa, baina biolentzia horrek milaka aurpegi dituela: sexu jazarpena, sexu objektu gisa ikusiak izatea, horrelako egoeretara ohitu beharra, edota emakumezkoen diru iturrien kontrola, esaterako.
Udalerrian gertatukoaren harira, taldeak animatu du edozein eraso matxista jasan duten emakumeak eurekin harremanetan jartzera, saretzen jarraitzeko eta elkar babesteko.
Horrez gain, sareak nabarmendu du matxismoari aurre egitea guztion ardura dela eta argi eta garbi zabaldu dute bi aukera daudela: konponbidearen edo arazoaren parte izatea.
Ildo horretatik, gogoratu dute matxismoa ere badela erasoa pairatu dutenen hitzak zalantzan jartzea salaketa egiten dutenean, hartu beharreko ardurei entzungor egitea edota gizonezkoen artean aliantzak eraikitzea egoera aldatu ez dadin.
Argazkiak eta bideoa: Naia Vallejo Torres