Rlantz ekoizle amurrioarrak eta Ziztada abeslari bilbotarrak disko berria sortu dute eta laster entzungai egongo da osorik. Ipar Haizea EPak bost abesti ditu eta bikoteari beste musikari bat batu zaie, Komadü saxofonista. Ohikoan bezala, Rlantzek sortu ditu dub edota techno erroko baseak eta Ziztadak jarri du ahotsa.
Emaitza osoa entzuteko aukera egongo da martxoaren 14tik aurrera euren bandcampean, baina duela egun gutxi lagin bat kaleratu dute, Bizitzak arriskuan, reggae generokoa.
Otsailaren 27an Kultura Estatikoa kantaren txanda helduko da, doinu technoagoak dub musikarekin uztartuko dituena. Martxoan Ur urdina, Dub kultura eta Helduko da lanak argitaratuko dituzte eta aipatutako generoak ez ezik, elektronikoa ere jorratuko dutela iragarri dute.
Komadü saxofonista batu da proiektura lan berri honetan.
Letren edukiari dagokionez, taldeak ez du norabidea aldatu diskoan: "Gizartean aurrerapausoak ematea eta aldi berean aldaketa pertsonalaren beharra azpimarratzen du. Kanta bakoitzak, injustizia sozialak eta barne borrokak ukitzen ditu, baina, aldi berean, elkartasun eta itxaropen mezu bat eskaintzen du".
Kaleratzear dagoen EParen azala ere aipatu nahi izan dute musikariek: "Handy-k egina, robot baten irudia darama. Teknologia eta musika, gizakiok sortutakoaren arteko harremana irudikatzen du. Koloreek EParen funtsa islatzen dute, Komadü saxofonistaren parte hartzea kontuan hartuta. Bere saxoaren urre koloreak robotaren tonuekin bat datoz".
Zortzi urte
Bere kideak gazteak izan arren, Rlantz eta Ziztada proiektuak zortzi urte ditu jadanik. Euskal Herriko Sound System giroan erditu zen taldea eta reggae eta dub abestiak euskaraz sortzeko hautua egin zuen. Hiru disko sinatu dituzte dagoeneko: Egun Hotzak (2018), Azken Argiak (2020) eta KSMS (2021).