1965. urteko uda berezia izan zen Amurrion, orduko jaietan atera baitziren lehenbizi kalera Euskotarrak eta Trot-Art kuadrillak. Gauzak hala, aurten 60 urte beteko dituzte bi jai taldeek, eta bata bestearen atzetik egingo dituzte ospakizunak.
Tror-Arteko kideek martxoaren 29a hautatu dute horretarako, egun osoko egitaraua prestatuta. 13:00etan hasiko dira poteo musikatuarekin, 14:30ean talde argazkia egingo dute eta handik ordu erdira bazkalduko dute, Mendiko Eskolan. Otordurako tiketak gaur bertan jarriko dituzte salgai Rinconcito tabernan, martxoaren 21era arte.
Bingo musikatuarekin girotuko dute bazkalostea, eta dantzekin, zozketarekin eta DJarekin luzatuko dute parranda, gauera arte.
Hurrengo asteburuan iritsiko da Euskotarraken txanda, apirilaren 5ean. Oso antzeko eskema izango du euren jaiak ere: kuadrillako argazkia, pregoia eta txupinazoa eguerdian, poteo musikatua Otxote Ugarterekin jarraian, eta bazkaria gero, Mendiko Eskolan berriz. Martxoaren 20an agortuko da izena emateko epea, dirua sartuta kartelean agertzen den kontu korrontean.
Arratsaldean, aldiz, bingo musikatua, puzgarria, zezen mekanikoa eta haurrentzako txokolate jana egongo dira. Odolosteak banatuko dituzte iluntzean, argazki emanaldia eskaintzen duten bitartean, eta DJ Varro arduratuko da gaua girotzeaz.
