Urte berezia izango da 2026a Amurrio Txirrindulari Klubarentzat. Duela bost urte, pandemia betean, 50 urte bete zituen klubak, eta orain txirrindularitza eskolak beteko du mendeurrena.
Izan ere, 1976an sortu zuten klubeko kideek Amurrioko Txirrindularitza Eskola. Urte biziak izan ziren horiek tokiko txirrindularitza zaleentzat. 1978an Espainiako Itzuliak bere azken aurreko jardunaldia Amurrion bertan bukatuko baitzuen, KAS taldeko Txomin Perurenaren garaipen eta guzti.
Dokumentala grabatuko dute Txirrindularitza Eskolen 50. urteurrena ospatzeko
Hamaika belaunaldi
Gogotsu eta denboraz heldu nahi diote Amurrioko Txirrindularitza Eskolaren 50. urteurrenari. Lehen urratsarekin eskolak herriko txirrindularitzan utzitako, argazki, istorio eta bestelako materiala biltzea dute helburu.
Horretarako, belaunaldiz, belaunaldi, topaketak antolatzeari ekin diote Amurrio Txirrindulari Klubak Matiasen duen lokalean. Orain arte bildutako materialarekin erakusketa txikia antolatu dute egoitzan, eta topaketaz topaketa material hori handitzea da urteurrenaren antolaketan murgilduta dauden kideen asmoa.
Klubeko kideek deia luzatu nahi izan diote inoiz txirrindularitza eskolako kide izan diren pertsona orori, klubarekin harremanetan jarri eta urteurrenaren prestaketan aletxoa jartzeko.
Bigarren helburu bat badute ere antolatzeari ekin dioten belaunaldi arteko topaketekin: dokumentala grabatzea. Txemi Llano bideo-ekoizle eta txirrindularitza zale amurrioarra dabil ikus-entzunezko piezaren sorkuntzaren atzean.
Datorren urtean estreinatuko dute lana, Amurrio Antzokian egingo duten 50. urteurren jaialdian. Lehenengo urratsek fruitua eman dute, eta honezkero 150 lagun baino gehiago elkartu dira urteurrena antolatzeko WhatsApp taldean. Datozen hilabeteetan definituko dute 2026ko egutegia.
Sasoi betean
Sasoi betean dago txirrindularitza Amurrion. Gaur gaurkoz berrogeita hamar gaztek baino gehiagok osatzen dute txirrindularitza eskola. Xabi Alonso entrenatzailea baikor agertu da kirolak herrian duen etorkizunarekin.
Ordea, Araban antolakuntza falta dela aitortu du: "Kirola asko praktikatzen da, baina Arabako talde asko ahul daude". Datorren urteko ospakizunak egoera irauli eta Amurriotik kanpo ere txirrindularitza praktikatzera bultzatu nahi ditu belaunaldi berriak.