Produkzio handia da David Perez Sañudoren Sacamantecas filma. Azken Erromantikoak eta Ane pelikulen zuzendaria genero intimista alde batera utzi eta thriller batean murgildu da buru belarri. Istorioa XIX. mendeko Araban dago girotua, eta 'Sakamantecas' goitizenez ezagututako Juan Diaz de Garayo gasteiztarraren hilketak ditu ardatz. Gainera, garaiko euskarari ere presentzia nabaria eman nahi izan diote pelikulan, eta lan handia egin dute orduko euskalkia berreskuratzeko.
Izen ospetsuek osatzen dute filmaren aktore zerrenda; Antonio de la Torre, Patricia Lopez Arnaiz eta Josean Bengoetxea, besteak beste.
Filmaketa luzea
Hilabete luzez aritu da Sañudoren lan-taldea pelikula Arabako hainbat txokotan grabatzen. Polemikak ere inguratu egin du filmaketa. Izan ere, Gasteizko gotzainak galarazi egin zuen pelikula Santa Maria katedralaren barruan grabatzea. Urtarrilean, ordea, ekoizleek egoera bideratzea lortu zuten eta zenbait eszena grabatu zituzten gizateriaren ondare den katedral zaharrean.
Gasteizko alde zaharreko beste hainbat txokotan ere grabatu dute Sacamantecas. Aiaraldearaino ere iritsi da produkzioa. Hain zuzen, Baranbioko Garrastatxu baselizan grabatu zituzten hainbat eszena iragan udazkenean, bertako txokoa baliatuta. Aiaraldea Komunikabideak aukera izan zuen grabaketara bertaratu eta Sañudoren lan berria bertatik bertara ezagutzeko.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!