Goikolarra auzoa urbanizatzeko proiektua onartu du Amurrioko Udalbatzak, aho batez. Modu horretan, bide emango zaio EGITU SLP enpresak idatzitako proiektuaren egikaritzeari, 1.573.303,32 euroko aurrekontuarekin.
Udalak nabarmendu du honakoa “urrats garrantzitsua” dela “auzoko urbanizazioaren eraldaketarako prozesuan”, eta nabarmendu du bizilagunen “parte-hartze aktiboari esker” izan dela posible.
Proiektuaren bidez, honako hobekuntza hauek egingo dituzte auzoan:
- Berdeguneak mantendu eta hobetuko dituzte, plazako zuhaitzak kontserbatu eta lorategietako irisgarritasuna hobetuta.
- Haur parkea berrituko dute, “irisgarritasuna eta modernizazioa bermatuz”.
- Argiteria hobetuko dute plazan eta etxebizitzen sarreretan.
- Aparkalekuak berrantolatuko dituzte futbito zelaian, plazan oinezkoen zirkulazioa lehenetsiz.
- “Bide segurtasuna eta irisgarritasuna” hobetuko dituzte, “sarrerak hobetuz eta oinezkoentzako pasagune berriak gehitzeko aukera aztertuz”
- Auzotarren lokalean hobekuntzak egingo dituzte.
Parte hartze prozesua
Tokiko erakundearen hitzetan, “auzotarrek egindako eskaera bati” erantzuten dio ekimenak, eta parte hartze prozesua egin da azken hilabeteetan horri forma emateko.
Hiru kolpe nagusi egon dira. Iazko ekainean “saio parte hartzaile bat” egin eta “karpa herritar bat” jarri zen, “auzoaren diagnostikoa egin eta lehenengo proposamenak” biltzeko, “mugikortasunari, irisgarritasunari eta espazio publikoaren erabilerei buruz”.
Hurrengo hilabetean, aldiz, lehenengo emaitzak aurkeztu eta bizilagunekin kontrastatu zituzten, eta azaroan aurkeztu zuten azken proposamena, “auzotarrek egindako ekarpenetara egokitua”.
Alegazioak aurkezteko epea
Proiektua onartzeaz gain, desjabetza espedientea ere abiatu du Udalak, lanak egiteko beharrezkoak diren jabegoak eskuratzeko. Hori dela eta, 15 eguneko informazio publikoko epea ireki dute, interesdunek alegazioak aurkezteko tartea izan dezaten.