60 urte bete ditu Trot-Art kuadrillak. Zein da taldearen gaur egungo egoera?
Gaur egun gehiengoa gazteak gara. Egia da belaunaldi zaharretatik pertsona batzuk parte hartzen jarraitzen dutela, baina orokorrean gazteok eramaten dugu kuadrilla.
Zenbat kide zaudete une honetan?
Jende kopurua ezin dizugu esan zehazki, bazkarietan jende asko gara eta gero gauzak antolatzeko orduan lau. 30 pertsona inguru izango gara egunerokoan parte hartzen dugunak. Bagaude gazteak eta gero badaude baita txikiagoak direnak ere. Azken bi urteetan jende gehiago batu da kuadrillara, eta asko eskertu dugu hori. Hala ere, ez dago inplikaziorik.
Inplikazio eza kontu orokortua dela esango zenukete?
Ezin dizugu esan, kuadrillen artean ez dugulako gauza hauetaz hitz egiten. Badakigu Dantza Lagunaken gure antzeko egoeran daudela: lau pertsonek hartzen dute gidaritza, kanpora begira behintzat parte hartze handiagoa dagoela dirudien arren.
Zer arrazoi medio sartu da jende berria Trot-Arten? Kuadrilla aukeratzen duzu edo kuadrillak aukeratzen zaitu zu?
Nire kasuan, adibidez, familia osoa izan da Trot-Artekoa, betidanik. Batu diren pertsona berriek, aldiz, lagunak zituzten kuadrillan, edo ez zuten jai-talderik eta hona animatu dira.
Karrozak izaten dira Amurrioko kuadrillen ikur nagusia. Zuen kasuan ere hala izaten da? Edo baduzue bestelako jarduera bereizgarririk?
Guk ez dugu ezer gehiago antolatzen. Bilerak egiten ditugu jaien inguruan hitz egiteko, karrozako gaia prestatzeko eta abar. Baina, kanpora begirako ekintzei dagokienez, abuztuko jaietara mugatzen gara, aurten salbu, urteurrena ospatzeko jaia egingo dugulako.
Larunbat honetan egingo duzue jai hori. Zein da plana?
Gure asmoa bazen kuadrillako jendea batzea, garai batekoa zein gaur egungoa. Baina, nire iritziz, nahiko desastrea izan da, jendearen inplikazioa dela eta. Pentsatuta geneukan berrehun pertsonarentzako ospakizuna izatea eta ez da horrela izango. Horregatik, nire partetik behintzat, nahiko etsituta gaude jendeak ez duelako parte hartzen. Hau egiten dugu kuadrilla berpizteko, hemen gaudela erakusteko, baina jendea ez bada etortzen ez dago ezer erakusteko. Betikook emango dugu aurpegia, beti bezala (barreak). Alde horretatik, apur bat tristea bada. Egia da gero jaietan egoera bestelakoa dela, jende gehiago animatzen delako. Baina badirudi udako kontua dela soilik, urtean zehar ez dirudi existitzen garenik.
Baina hori da baita jaiaren asmoa.
Bai, baina horrelako kontuak antolatzeko eskertzen da jendearen parte hartzea. Nik ulertzen du belaunaldi zaharragoek euren kontuak dituztela eta bere garaian gauzak egin zituztela, baina guztiok egin behar dugu bultza, bestela hau ez doalako aurrera.
Zer da larunbaterako antolatu duzuena?
Poteo musikatua egingo dugu tabernaz taberna, bazkaria egingo dugu Mendiko Eskolako frontoian, eta arratsaldean dantzaldia izango dugu, adin guztietara egokitua; eta, eguna amaitzeko, DJa, kuadrillako kide baten eskutik.
Formatu txikiagoko jaia egingo duzue, beraz.
Bai, familiarragoa (barreak).
Elkarrizketa apur bat baikorrago amaitzeko: iaz karrozen desfileko irabazleak izatea lortu zenuten, hainbat urteren ostean.
Bai, 23 urteren ostean. Gogorra izan zen, ez genuelako inoiz horrelako karroza bat egin.
Uste zenuten aukerak zenituztela?
Bagenuen itxaropena, baina ez genuen espero. Sorpresa izan zen, baina bai uste dugu merezita irabazi genuela, eginiko esfortzuagatik. Egia da karroza egitera bai animatu zela jendea, eta haur asko ere animatu ziren.
Zuen ustez, zer egin zenuten ezberdin iaz aurreko 23 urteekiko?
Orain dela hiru urte arte 4-7 pertsona joaten ginen karrozak egitera. Horrekin ezin da ezer egin, lan handia delako karroza bat egitea, esku gehiago behar dira: dekorazioa prestatzeko, musika, elektrizitatea… iaz martxa gehiago hartzen hasi ginen, aurreko urteetan izandako akatsak detektatuz eta horiek konpontzen saiatuz.
Peter Pan-en gaia aukeratu genuenean, adibidez, oso eskas ibili ginen argi aldetik. Ez zen ondo ikusten egindako lan guztia. Soinu ekipoa ere ez zen egokiena izan iaz arte, eta hori ere bideratzen saiatu ginen. Udaletxeak eskaintzen dizkigun elektrizitate sorgailuek ere ez dute asko laguntzen. Ez dakigu zergatik, baina gehienak desfilean bertan itzaltzen dira. Behin baino gehiagotan gertatu zaigu hori, baina iaz zortea izan genuen alde horretatik ere. Funtsean, jendea gehiago inplikatu zen, eta hori ikusi zen emaitzan.
