Amurrioko EH Bilduk mozioa prestatu du udal osoko bilkuran eztabaida dadila txirrindularien eta oinezkoen arteko elkarbizitza hobetuko duen ordenantza berria eta urte eta erdiko epea proposatu du horretarako.
Izan ere, EH Bilduren aburuz, txirrindularen erabilerarako oztopo ugari daude udalerrian egun eta "bizikletaren erabilera normalizatzeko eta seguruago bihurtzeko, eta oinezkoen eta txirrindularien arteko elkarbizitza sustatzeko helburuarekin" landu dute gaia.
Oztopo nagusiak
Alde batetik, koalizioaren iritziz, seinaletika bertikala ibilgailu motordunentzat pentsatuta dago gehienetan, bizikleten berezko kasuistika kontuan hartu gabe. "Horren adibide da bidegorri gisa seinaleztatutako tarte batzuetan ezin bizikletaz gurutzatzea", zehaztu dute.
Txirrindularientzako seinaleak ibilgailu motordunentzat daude instalatuak eta horrez gain, bidegorriak etenak ditu Amurrion, EH Bilduk azpimarratu duenez.
Bestetik, bidegorrien sarea -hau da, espreski txirrindularientzat sortutako bideak- ez da jarraitua eta etenak ditu. Horren ondorioz, garraio mota horren erabiltzaileek itzulinguruak egin behar dituzte edo errepidea baliatu. "Horrek dakarren arriskuarekin", gaineratu du EH Bilduk.
EAJ eta PSE-EE aurka batzordean
Udalbatzan eztabaidatuko bada ere, EH Bilduk jakinarazi du EAJk eta PSE-EEk egitasmoaren kontra bozkatu zutela aurreko batzordean.
Edonola ere, Jon Berganza Amurrioko EH Bilduren bozeramaileak azaldu duenez, "bizikleta eguneroko mugikortasunerako garraiobide gisa erabiltzea erronka handienetako bat da hiri eta ingurune atseginagoak, osasungarriagoak eta gutxiago kutsatzen dutenak lortzeko".