Amurrioko Eguneko Arretarako Landa Zentroko (CRAD) langileek, LAB sindikatuarekin eta Amurrioko Emakumeon* Sarearekin indarrak batu eta agerraldia egin dute gaur. Zaintza-sistema publiko baten aldeko konpromisoak eta zerbitzuak publifikatzeko helburuan bat egiten dute hiru eragileek, eta, hain zuzen ere, zentroko langileen lan-baldintzak hobetzea eta lanaren aitortza exijitu dituzte.
Pribatizatutako zerbitzua
Amurrioko Eguneko Arretarako Landa Zentroa pribatizatuta dagoen kudeaketa publikoko zerbitzua dela salatu dute gaurko agerraldian. Hori dela eta, Arabako etxez etxeko laguntza zerbitzuko sektoreko hitzarmenak arautzen ditu bertako langileen lan-baldintzak; "hitzarmen erabat prekarioa" CRADeko langileen hitzetan. "Urtean 1.680 lanordu ditugu, hilean 1.100 euro inguruko soldatarekin", kexu dira beharginak.
Zentroaren kudeaketa "bideraezin" egiten duen lan-zama handia daukatela ere gaineratu dute: "Bi langileri dagokigu mendekotasuna duten 15 pertsona ingururi egunero arreta ematen dien zerbitzu baten kudeaketa osoa; zaintzen ditugun pertsonei banakako arreta ematea, sukaldea, administrazio-lana, txostenak egitea, familiekin eta udal zerbitzuekin koordinazioak egitea, garbiketa..."
Zaintzen enpresari interpelazioa
Eskaera zuzena luzatu diote CRADeko langileek eta LAB sindikatuak Amurrioko zerbitzua kudeatzen duen Zaintzen enpresri: lantokiko hitzarmen bat negoziatzea. Beharginek eta sindikatuak ezinbestekotzat dute lan-hitzarmena zerbitzuan egiten duten "zaintza-lana arautzeko asmoz eta egiten dugun jardunak esaktzen duen aitortza lortzeko asmoz". Horrenbestez, administrazio publikoko langileen ekiparaziora hurbiltzea dute helburu. Zaintzen enpresak ezezko irmoa eman dio edozein elkarrizketa-prozesu abiatzeari.
CRADeko langileek ez dute Zaintzen enpresaren ezezkoa onartu: "Langile publikoak gara, eta zaintza-sistema publiko bat dugu jomuga. Bitartean, gure lan-baldintzak hobetzeko negoziazio prozesu bati ekitea exijitzen dugu". LAB sindikatuak ere bide beretik jo du, Zaintzen enpresari lan-baldintzak duintzeko beharrezkoak diren urratsak eman ditzan eskatuz.
Udalari deia
Era berean Amurrioko Udalari ere luzatu diote deia Amurrioko CRADeko langileek eta LAB sindikatuak. Udalaren "borondatea eta inplikazioa" exijitu dute. Izan ere, Amurrioko Eguneko Arretarako Landa Zentroa udal kudeaketako zerbitzua izanik, tokiko-administrazioak finantzatu eta sostengatu beharko du balizko akordioa. "Erantzukizun politikoa ezinbestekoa delako Amurrioko biztanleek zaintza zerbitzu duina behar dutelako, zaintza pribatizatutako langileek lan publikoa egiten baitugu", aldarrikatu dute agerraldiaren amaieran.