Amurrioko Udal Gobernuak uko egiten jarraitzen dio udal langileekin biltzeari. Gaur 50 egun bete dira negoziazio-mahaiaren inguruan biltzeko langileen ordezkariek eskaria egin zutenetik. Behargin publikoen hitzetan, honezkero iraungi egin da legez Udal Gobernuak bilera eskakizunari erantzuteko zuen epea. Hori dela eta, kexa aurkeztu dute gaur bertan Arartekoan.
"Udalaren jarrerak bultzatu egin gaitu Arartekoan kexa bat sartzera. Behingoz, Arartekoak presioa egin diezaion Udal Gobernuari, eta gurekin bil dadin", azaldu dio Aiaraldea Komunikabideari Aitziber Alcalde Langile Batzordeko ordezkariak.
2023an amaitu zen ordura arte indarrean zegoen giza-baliabideen plana. Plan berria garatzeko asmoz, 2024ko apirilean batzartu ziren aurrenekoz bi aldeak. "Ordutik hona Udal Gobernua ez da berriro batzartu Langile Batzordearekin. Gainera, hainbat erabaki unilateralki hartu ditu, batzordeak egindako proposamenei entzungor eginez", salatu du Alcaldek.
Mobilizatzen jarraituko dute, Udalak negoziazio-mahaian eseri arte. Datorren ostiralean berriro elkartuko dira udaletxe aurrean.