Eusko Jaurlaritzak gaur jakinarazi du hasi dela 'Mendi' izendatutako zentral eolikoaren proiektu teknikoaren eta ingurumen inpaktu txostenaren informazio publikoaren epea.
Egitasmo energetikoa 113 metroko zazpi aerosorgailuk osatzen dute. Azpiegitura horiek Amurrion egongo lirateke kokatuta. San Roke auzoaren gainean, hain zuzen, egongo lirateke horietako sei, eta beste bat Bergantzatik gertu.
Elektrizitatearen deskarga, aldiz, Aiaran egingo litzateke. Guztira, 33,47 milioi euroko aurrekontua dauka egitasmoak eta 30 MW ekoizteko diseinatu dute.
Aiaraldeko Mendiak Bizirik plataformak adierazi du zentralak eragin zuzenak sortuko dituela Badiolan, San Roken, Mariakan, Pardion, Okelurin, Bergantzan, Onzoñon eta Elexazar aztarnategi arkeologikoan, baita Luiaondon, Markixanan eta Orozkoko Urrejola eta Laudioko Olarte auzunetan ere.
Horretarako hemen beheko mapa prestatu dute, zeinean Ferosca eta Larragorri zentral eolikoak jaso ez ezik, zazpi aerosorgailuak ere islatu dituzten puntu gorriekin, karratu hori baten barruan. Halaber, Aiaraldeko Mendiak Bizirik plataformak ikur gorri eta horiekin markatu du bi kilometroko kalte eremua:
Hau ere ez dago Energia Berriztagarrien Lurralde Zati Planean
Plataformak salatu du oraindik onartu gabe dagoen Lurralde Zati Planean ez dagoela aipurik proiektuak okupatzen dituen lursailei buruz, hau da, ez daudela kokapen hautatu gisa aitortuta.