Hilabete hasieran inauguratu zuten Amurrioko La Casona aretoan Gervasio Sanchez fotokazetari ezagunaren Vidas Minadas, 25 años (Bizitza Minatuak, 25 urte) argazki-erakusketa, eta datorren asteko asteazkenera arte, hilak 16, egongo da ikusgai.
Sanchezek 1995ean hasi zuen lana erakusten dute argazkiek: Mozambike, Angola, Kanbodia, Bosnia-Herzegovina, El Salvador eta Nikaraguako minen biktimen bizitza dokumentatzen dute. Lanaren bitartez, Sanchezek ikusgarritasuna eman nahi die "tragedia hau zuzenean pairatu dutenei, haien erresilientzia eta duintasunaren aldeko borroka ikusaraziz gerrak eta indarkeriak markatutako testuinguruetan".
Dokumentazio funtzioa izateaz gain, ordea, salaketa ere izan nahi du fotodokumentalak. Izan ere, "arma industriaren zigorgabetasuna eta arazo hori desagerrarazteko gobernuen ekintzarik eza" utzi nahi ditu agerian.
Euskal Fondoak antolatu du erakusketa Arabako Foru Aldundiaren eta Amurrioko Udalaren laguntzarekin. Berez, Euskal Fondoak, erakusketa ahalik eta leku gehienetara hel dadin, doan eskaintzen die interesa duten erakunde publikoei.