Urteroko zapore eta osagaiekin bueltan dira Amurrioko San Jose auzoko jaiak. Auzoko Jai Batzordeak buru-belarri igaro ditu azken aste eta hilabeteak, udazkenera arte luzatuko den jai maratoiaren lehenengo etapa antolatzeko. Apirilaren 26an, ostirala, jaurtiko dute lehenengo suziria, eta, orduan, festa giroak hartuko ditu kaleak. Hain zuzen ere trikiti doinuekin alaituko dute auzoa babarrun janaren bueltan bizilagun guztiak elkartu arte. Bingoarekin bazkalostea igaro ostean, ohiko dantza erakustaldia eskainiko dute Zabaleko ikastetxeko frontoian 17:30etik aurrera.
Iluntzean musikarien txanda iritsiko da. Urduña eta Amurrioko gaztez osatutako Deriba taldeak estreinatuko du San Joseko oholtza. Jarrain La Polla Records eta Barricada taldeen banda tributoen txanda izango da. Azkenik, DJ Blessivek goizaldeko 5:00ak arte luzatuko du festa. Ohikoan bezala haurren eguna ospatuko dute biharmanuean, apirilak 27. Gaztetxoenek txokolate janaz eta haurrentzako jolasez gozatzeaz gain Xaiborren diskofestan dantzatzeko aukera izango dute ere.
Bi eguneko atsedenaldiaren ostean, apirilaren 30ean, asteazkena, bueltatuko da festa San Jose auzora. 21:00etan Txapela Brava eskualdeko talde sortu berriak kontzertua eskainiko du. Aurretik Bocabeats Comedia bikoteak umore ikuskizuna eskainiko du, 19:30ean. Lowe 1980ko hamarkadako bertsio taldeak eta DJ Varrok izango dute gauari segida ematearen ardura.
Klasikoa bilakatu den txirrindularitza lasterketarekin agurtuko dituzte San Joseko jaiak maiatzaren 1ean. Kirol-proba iraun biartean bermut dantzaldiaz eta igel-toka txapelketaz gozatzeko aukera izango dute auzoko bizilagunek.
Gaztetxea zabalik
San Joseko jaiekin bat eginez Amurrioko Gazte Asanbladak musika eskaintza oparoa antolatu du Amurrioko Gaztetxean. Apirilaren 26an rap doinuei emango diete protagonismoa. Lekeitiotik etorritako 48280 rapero taldeak eta tokiko raperoak biltzen dituen Streetlight kolektiboek bat egingo dute gune autogestionatuko oholtzan. Maiatzaren 30ean aldiz, NØT eta Belgorri taldeak arituko dira Gaztetxeko giroa astintzen, DJ radio patiorekin batera.
Gazte Asanbladako kideek aurraratu dutenez 21:30ean zabalduko dituzte Gaztetxeko ateak, eta kontzertuak 23:00etan hasiko dira bi egunetan.