Egun gutxi batzuk baino ez dira falta Aiara Fest jaialdiaren estreinako edizioa abiatzeko. Ostiralean, 17:30ean irekiko dira ateak Reforren egokitutako eremuan, eta milaka lagun bertaratuko dira festaz gozatzera. Antolatzaileek adierazi dutenez, 4.000 bat sarrera saldu dituzte dagoeneko, eta 5.000 pertsonetan zehaztu dute gehieneko aforoa.
Zetak, Gatibu, Zea Mays edo Gorka Urbizuren gisako talde euskaldun entzutetsuak estatuan zeharreko doinu eta estilo anitzekin elkartuko dira asteburuan. Bi eszenatoki muntatu dituzte, baina kontzertuek ez dute elkar zapalduko, eta hamabi orduz jarraian musika ozen entzungo da Reforreko eremuan.
Azken sarrerak salgai
Bi egun eskasen faltan, azken sarrerak geratzen dira oraindik salgai. Egun bakoitzerako sarrerak erosteko aukera ematen du festibalak (55 euroan bakoitza). Bestalde 82,5 euroko abonu orokorra ere eros daiteke. Amurrioko bizilagunek, gainera, 55 euroko salneurri berezian eskuratu dezakete asteburu osoko abonua. Gaztetxoek ere dute prezio murritzago bat. Izan ere, 16 urtetik beherakoentzat 'kids' abonua dago eskuragarri 16,50 euroren truke.