Larunbatean 17:00etan Amurrio Clubeko gazte kategoriako taldeak partida erabakigarria izango du Basarten. Izan ere, lehia irabaziko duenak lortuko du 2025/2026 denboraldia Euskal Ligan lehiatzea.
Amurrioarrek oso denboraldi txukuna egin dute liga erregularrean eta ia partida guztiak garaitu dituzte. Hala ere, Olarizuk hiru puntu gehiago eskuratu zituen eta bigarren postuan amaitu dute txapelketa aiaraldearrek.
Aintzat hartuta txapeldunak soilik lortzen duela igoera automatikoa, amurrioarrek Euskal Ligan egoteko promozioa jokatzen ari dira. Kanporaketa hori hiruki gisa jokatzen da; Arabako, Bizkaiko eta Gipuzkoako bigarren sailkatuen artean.
Lehen bi partidetan CD Lagun Onak klub azpeitiarrak 4-1 menderatu zuen Abadiño eta bigarren norgehiagokan amurrioarrek 0-1 irabazi zioten Durangaldeko taldeari bere futbol zelaian.
Gauzak horrela, Amurrio Clubak bere esku izango du Euskal Ligan aritzea, baina lehenik eta behin CD Lagun Onak gainditu beharko du eta ez dirudi lan erraza izango denik, eta ez bakarrik kirolaren arloari dagokionez. Izan ere, badirudi Azpeitiatik autobus bat baino gehiago bertaratuko dela Urola Kostako jokalariak animatzera.