Amurrioko Hizkuntzen Mapa osatu dute Amaurre, Zaraobe, Aresketa Ikastola, Mendiko Eskola eta Zabaleko ikastetxeek, elkarlanean. Modu horretan, Aiaraldeko Euskalgintza Kontseilua eskualdeko hezkuntza zentro guztiekin batera garatzen ari den Aiaraldeko Hizkuntzen Mapa proiektuarekin egin du bat Amurrioko hezkuntza komunitateak.
"Gure ikasgeletan eta auzoetan hizkuntza asko daude presente: horietako bakoitzak dakarkigu istorio bat, jatorri bat, munduari begiratzeko modu bat"
Iragan ikasturtean abiatutako lanketaren emaitza aurkeztu zuten ekainaren 19an GUK eskulturaren aurrean bost zentroetako ikasle eta irakasleek egindako agerraldi bateratuan. Proiektua udalerriko hizkuntza aniztasuna ezagutzeko eta berau balioan jartzeko ariketa izan dela azpimarratu zuten: "Gure ikasgeletan eta auzoetan hizkuntza asko daude presente: horietako bakoitzak dakarkigu istorio bat, jatorri bat, munduari begiratzeko modu bat. Eta hori guztia aberastasun gisa ulertzen dugu".
Aniztasun horren erakusle, bideoa partekatu dute bost ikastetxeetako ikasle, irakasle eta gurasoek, hizkuntza desberdinetan "ongi etorri" nola esaten den azalduz:
AMURRIOKO AHM. Aiaraldeko Hizkuntzen Maparen barruan, Amurrioko ikasleek Amurrion dauden hizkuntzak aztertu eta bideo bat sortu dute "Ongi etorri" hitza hainbat hizkuntzatan azalduz. pic.twitter.com/nzltrmqnKD
— Aiaraldeko euskalgintza kontseilua (@eusk_kontseilua) June 23, 2025
Hizkuntza guztiak "garrantzitsuak eta zaindu beharrekoak" direla aldarrikatu dute. Bide horretan, "euskarak gure komunitateko hizkuntza guztien arteko zubi izateko aukera" eskaintzen duela azaldu dute Amurrioko hezkuntza komunitateko ordezkariek: "Euskara, hizkuntza aniztasun horren erdigunean, elkargunea da. Denok ulertzeko, denok parte hartzeko, denok sentitzeko hizkuntza izan nahi du".