Amurrioko Udalak oharra zabaldu du jakinarazteko Foru kaleko azoka zaharraren erabilera behin betiko definitu dutela eta ez dutela bideratuko etorkizuneko liburutegirako, herritarren erabilerarako baizik.
Duela hiru urte onartutako ekipamendu-planaren arabera, han kokatu behar zuten liburutegia. Baina, horren ordez, 18.125,80 euroko kontratua esleitu diote Arzanegi Arquitectura enpresari eta eurena izango da erabilera berriak zehaztuko duen proiektuaren erredakzioa.
Udalak adierazi duenez, "diseinu berriak eraikinaren erabilera polibalentea aurreikusten du. Beheko solairuan turismo-bulegoa, 100 pertsonentzako edukiera duen auditorioa eta erakusketa-gela kokatuko dira. Bestalde, goiko solairua —500 m² baino gehiagoko espazio irekia— auzo jardueretarako erabiliko da, hala nola dantzak, herri-bazkariak eta gizarte-ekitaldiak egiteko, baita astean zehar haurrei zuzendutako jardueretarako ere".
Liburutegiak espazio gehiago hartuko du egungo eraikinean
Gauzak horrela, tokiko erakundeak aurreratu du udal liburutegiak solairu bat gehiago okupatuko duela. Hain zuzen, hiru solairu hartuko ditu: beheko solairua baliatuko dute mailegu-zerbitzu eta ordenagailu-erabilerarako, eta goiko solairuetan haur eta helduen guneak antolatuko dituzte, funtzionaltasuna eta irisgarritasuna hobetuz.
Esku-hartze gehiago
Halaber, Foru kalearen ingurua urbanizatzeko proiektua osatzen ari dira. 1.500 m²-ko azalera hartzen du egitasmoak eta zoladura, hornidura-sareak, argiteria eta kanalizazioak berritzea barne hartzen du. Proiektua Egitu, Arquitectura, Ingeniería y Urbanismo S.L.P. enpresari esleitu diote, 8.560,75 euroren truke (BEZa barne).