Amiantoa duten Amurrioko azpiegitura eta eraikinen mapa osatu behar dela uste du EH Bilduk, eta mozioa erregistratu du hori eskatzeko.
Oposizioko taldeak gogorarazi du Europar Batasunak proposatu duela udalerri guztiek horrelako mapak osatzea 2028a baino lehen. "Hori dela eta, ekonomia zirkular baterako hondakinei eta lurzoru kutsatuei buruzko apirilaren 8ko 7/2022 Legeak, besteak beste, amiantoa instalazio eta kokaleku publikoetan kentzean jartzen du fokua, eta 2028a ezartzen du horretarako azken urte moduan", gaineratu du koalizio subiranistak.
EH Bilduren aburuz, amiantoaren kontserbazio-egoera eta erretiratze-kostua ere barnebildu beharko lituzke azterlanak, "ondoren materiala kentzeko lehentasunak finkatzeko".
Talde politikoko kideen ustetan, Udalak hartu beharko luke material horren erretiratzearen ardura, lan hori bere gain hartuz edo hori "ekonomikoki errazteko" diru-partidak gaituz.
"Herritarren ongizatea eta osasuna lehentasunezkoa" dela argudiatu du EH Bilduk, amiantoak "asbestosia edo biriketako minbizia bezalako gaixotasunak" eragiten dituela eta lurzoruak kutsatzen dituela nabarmenduta.