Bihar eta etzi ospatuko dituzte Larrinbeko jaiak eta horretarako egitarau anitza eta bitxia prestatu dute, oso bestelako interes eta adineko lagunak erakartzeko.
Berez, ekintzak bihar hasiko dira 19:00etan mus txapelketarekin eta ordu erdi beranduago Aiara Dantza Taldeko kideen erakustaldia izango da. 21:00etan Ugarte Otxoteak jo eta abestuko du, parrillada egiten duten bitartean. Azkenik, Berriztu erromeriak dantzatzeko aukera emango du 23:00etatik aurrera.
Ostiralean ekintza gehienak
Aintzat hartuta Done Jakueren omenezko jaiak direla Larrinbekoak, ostiralean izango dira jarduera gehienak. Hori bai, motor klasikoekin abiatuko dute eguna, erakusketa antolatuko baitute.
11:45ean kanpai-hotsek hartuko dute herria eta 12:00etan meza hasiko da Zankueta abesbatzaren parte hartzearekin. 12:30etik 14:00ak arte Ikusgunek karpa informatiboa jarriko du LGTBIQ+ kolektiboari buruz. Ordu berean puzgarriak egongo dira eta 13:00etan paellen lehiaketako izen-ematea izango da. 14:00etan aurkeztu beharko dituzte.
17:00etan puzgarriak itzuliko dira eta 18:00etan apar jaiaren ordua helduko da. DJ Xaiborren emanaldiak itxiko du eguna.