Zer sentsazio sorrarazten dizu zure kuadrillaren ordezkaria izateak aurtengo jaietan?
Hitz batean eragiten didan sentsazioa emozioa dela esango nuke. Izan ere, zure jaietako taldea irudikatzen ari zara, eta zoragarria da, bai ordezkaria izateagatik, bai gure jaietako beste puntu bat ikusteagatik.
Nola bilakatu zinen zure kuadrillaren kide?
Ni betidanik izan naiz beste kuadrilla bateko kide, eta nire familia ere bai, baina denborarekin jaien beste ikuspegi bat nahi nuela ikusi nuen, eta gehiago identifikatzen nintzen kasu honetan Dantza Lagunak nire oraingo kuadrillarekin.
Zein da aurtengo zuen gurdiaren gai nagusia?
Bada, gure karrozaren gaia aurten Kuba da, eta gure inspirazioa Kubako taberna bat. Herriari kolore asko, poz handia eta saltsa asko transmititu nahi diogulako. Gure izenak dioen bezala, oso gustuko dugu dantza egitea.
Zer da Amurrioko jaiak berezi egiten dituen hori?
Nik uste dut Amurrioko jaiak bereziak direla kuadrilletako jendea elkarrekin gozatzera ateratzen delako, herriak proposatzen dituen ekitaldietan parte hartzen duelako. Garrantzitsuena, dena borobiltzen duena, karrozen desfilea da.
Zein ekintzetarako zaude gogotsuen?
Nire rankingean Txupinazo Eguna dago lehenengo postuan. Gero, Kuadrillen Eguna, egun horretan gainera, Tanxugueiras abestera datoz eta karrozen desfilea da.
Zein da jaietako gau bat bukatzeko modurik onena?
Nire ustez jaietako gau bat amaitzeko modurik onena zera da: kebab on batekin indarrak hartu eta belardietara jauzi egitea.
Amurrioko jaiak eskualdeko onenak direla argudiatzeko hiru hitz:
Tradizioa: familiak elkarrekin jateko batzen direlako, eta duela urte batzuk egiten ziren gauzak egiten direlako. Eromena: giroa desinhibitua, dibertigarria eta paregabea delako. Bihotza: jendeak dena ematen duelako, pasioz eta hurbiltasunez.