Amurrioko jaietako egitarauko ekintzetan parte-hartzeak sari berezia izango du aurtengoan: Urrezko Iguarrakoa. Amurrioko Udalak eta Jai Batzordean elkartzen diren eragileek sortutako garaikur berriak, aitortza egin nahi dio festetako kuadrilla parte hartzaileenari.
Gauzak horrela Euskotarrak, Dantza Lagunak, Herriarenak, El Boli, Trot-Art eta Txabolakoak kuadrillek lehiarako aitzakia berria izango dute mahaigainean. Lehiarako bakarrik ez, elkar topatzeko eta festetaz batera disfrutatzeko aukera eskaini nahi du eta Urrezko Iguarrakoak. Hain zuzen ere, kuadrillak elkarren artean gehiago “elkartzea eta nahastea” da norgehiagokaren helburu nagusia. Egitasmo berri honekin “kuadrillen parte hartze handiagoa sustatu eta kuadrillak kaletik ikustea” dute helburu Udalak eta Jai Batzordeak. “Gure ideia ez da ekintza berri bat sortzea, baizik eta, honezkero egiten direnak indartzea eta bateratzea”. Bide horretan kuadrilletako kide guztiei luzatu nahi zian diote parte-hartzerako deia: “umeak, nerabeak, gazteak eta nagusigoak”.
Egitarauko ekintza desberdinetan parte hartzeagatik, edota egitarauko ekintza batzuk aurrera ateratzen laguntzeagatik kuadrilla bakoitzak puntu bana jasoko du. Sukaldaritza lehiaketetan, jolasetan, lasterketetan edota Karrozen kalejiran sailkapenaren araberako puntuak banatuko dituzte, parte hartzeagatik lortutako puntuaz aparte.
Puntu guztiak batu eta jaietako azken egunean iragarriko dute kuadrilla irabazlearen izena, Iguarrakoaren agurra baino zertxobait lehenago. Kuadrilla irabazleak Urrezko Iguarrakoa eta 300 euroko saria jasoko ditu.