Txinpartarako prest da Aresketa Ikastola

Aimar Gutierrez Bidarte 2025eko abuztuaren 10a

Txinpartarako prest daudela adierazteko familia argazkia atera zuten atzo. / Aresketa Ikastola

Araba Euskaraz jaia ospatuko dute datorren urtean Amurrion, eta aurkezpen ofiziala irailean egingo duten arren, motorrak berotzeari ekin zion atzo Aresketa Ikastolako hezkuntza komunitateak.

Ekainaren 14an ospatuko dute Araba Euskaraz jaia Amurrion, baina Aresketa Ikastolako hezkunzta komunitatea hasi da, honezkero, beroketa lanak egiten.

Atzo familia argazki erraldoia egin zuten Ikastolako ikasle, irakasle, guraso eta langileek. Irailean aurkeztuko dute Arba Euskaraz jaiko iruditegi eta lelo ofiziala, baina aurretiaz "txinparta piztu" nahi izan dute herrian uda sasoirako espresuki atera duten kamiseta zurien olatuarekin.

Hainbatetan ospatu da Araba Euskaraz jaia Amurrion, beti ere Ikastola eta bertako hezkuntza proiektua hauspotzeko helburuarekin. 1986an egin zuten Arabako Ikastolen jaia aurrenekoz.

Ordutik, jaiaren beste lau edizio jaso ditu Amurriok, azkenengoa 2020an, Darabagu lemapean. Azken Araba Euskaraz jai hori COVID-19aren pandemiak erabat baldintzatuta ospatu behar izan zuten Ikastolako kideek.

Hasieran zehaztutako datan ospatzerik ez, eta pandemiak eragindako salbuespen neurriak zerbait leundu ahala ekitaldi xumeren bat edo beste antolatu zituzten. Oraingo honetan, ohiko ereduarekin itzuliko da Araba Euskaraz jaia Amurrioko kaleetara, udalerria milaka euskaltzaleren topaleku bilakatuz.

Hezkuntza Amurrio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.

Izan bazkide