Txupinazoa oraindik jaurti ez duten arren, jaien zurrunbiloan sartu dira dagoeneko Amurrioko Kuadrillak. Gaur eguerdian egin dute jai-taldeen ohiko aurkezpena, aurtengo jaietarako dituzten asmo eta erronken berri jendaurrean emateko.
Bero-zapatik babesteko, Juan Urrutia plazatik parkeko gerizpera mugitu dute urteroko aurkezpena. Euskotarrak, Dantza Lagunak, Trot-Art, Herriarenak, El Boli eta Txabolakoak kuadrilletako ordezkariak banan banan igaro dira mikrofono aurretik. Kuadrillen ohiko ziriken gainetik, palestinar herriaren aldeko oihua gailendu da ordezkari guztien partetik. Bozeramaile denek ere, eraso matxistarik gabeko jaien aldeko aldarria zabaldu dute.
Gaur arratsaldeko zazpietan jaurtiko dute txupinazoa Amurrioko udaletxeko balkoitik, eta, orduan bai, festa-giroa nagusituko da udalerrian datozen sei egunetan. Agenda atalean kontsultatu daiteke egitarau osoa. Aiaraldea Komunikabidetik jarraipen berezia egingo dugu festen egun guztietan, eta zuzenean emitituko dugu txupinazoa, 18:45etatik aurrera, hemen.