Harrera zabala izan du beste urte batez Minbiziaren aurkako martxak Amurrion. Ehunka lagun bildu dira Amurrioko Juan Urrutia plazan 10:30ean. Bertan egon dira Aurreraka emakume elkarteko kideak, Arabako Minbiziaren Aurkako Elkarteko ordezkariak eta baita Udaleko kideak ere. Horrez gain, Nerea Melgosak ere parte hartu du ekimenean, Eusko Jaurlaritzako Ongizate, Gazteria eta Erronka Demografikoaren sailburuak.
Hitzartze labur batzuekin, ohorezko aurreskuarekin eta Juan Antonio Alañaren adarraren doinuarekin abiatu dute martxa. Olako, Nerbioiko Parke Linealaren hasiera, Abiaga eta El Refor zeharkatu dituzte parte hartzaileek, plazan amaitzeko berriz.
Martxa hau da minbiziaren aurka Amurrion egiten den ekintza jendetsuena, baina ez bakarra. Arabako Minbiziaren Aurkako Elkarteak laguntza psikologiko eta sozialeko zerbitzua eskaintzen du astelehenero Kultur Etxean, eta edozein pertsonak eskatu dezake hitzordua 900 100 036 telefonoan edo alava@contrelcancer.es helbide elektronikoan, erabat doan.
Gainera, datorren urriaren 13an elkartearen jarduna ezagutzera emateko hitzaldia eskainiko dute arratsaldeko lauretan, toki berean.