"Zuzendaritzaren utzikeriaren aurrean" ekintzara pasa dira Tubos Reunidoseko langileak, eta haien kabuz garbitu dituzte lantegiraino doazen oinezkoen bideak.
Hain zuzen ere, Salbioko tren geltokia eta Tubos Reunidoseko zubia lotzen dituen espaloia garbitu dute. Urte luzez inolako mantenurik izan ez duen espaloia da hori, eta sastrakek guztiz estali dute. Hori dela eta, enpresaren zain egon gabe, euren kabuz kendu dituzte belar txarrak bertako beharginek.
Langileek Aiaraldea Komunikabideari azaldu diotenez, 1999tik dago indarrean lantegiko sarbideen gaineko eskumenak arautzen dituen Arabako Foru Aldundiaren eta Tubos Reunidos enpresaren arteko hitzarmena. Akordio horren arabera, multinazionalaren ardura da fabrikako sarbideen mantenua. "Zuzendaritza honen jakitun da baina entzungor egin die bideak garbitzeko gure eskariei", adierazi diote langileek komunikabideari.
Tubos Reunidoseko langileek urteak daramate Nerbioiko Parke Linealetik fabrikara sarbidea eskatuz. Beharginek lanera modu "osasungarri, jasangarri eta seguruan" bertaratzeko aukera aldarrikatu nahi izan dute burututako ekintzarekin. Izan ere, Nerbioiko Parke Linealean kokatuta dagoen arren, oinezkoen bide-berdetik lantegira dituen bi sarbideak itxita ditu Tubos Reunidosek.
Konpainiak Retina Eco saria jaso zuen iragan irailaren 30ean. Espainiako erreginak eman zion saria multinazionalari, "Energia eta Baliabide Berdeak" kategorian. Saria jaso izana "paradoxa ulergaitza" dela adierazi dute langileek, eta nabarmendu dute enpresaren jarrera ez datorrela bat Espainiako Diputatuen Kongresuan onartu berri den Mugikortasun Jasangarriaren Lege berriarekin.
Argazkiak: Aimar Gutierrez Bidarte