Arabako Foru Aldundiak gaur onartu du Amurrioko nagusien egoitza handitzeko eta eraberritzeko esleipena. Aurreko lizitazioan ez zen enpresarik aurkeztu, baina honetan Construcciones Castellano SA konpainiaren proposamena izan da hautatua.
1.342.638 euroko aurrekontua izango du lanak egiteko, eta sei hilabeteko epea. Diru horren truke beheko solairua handituko beharko du hegoaldean, egongela-jangela zabalagoa izateko, eta sarbide nagusiaren ondoan espazio berri bat sortzeko, bisita gela izateko egungo beharrari erantzuteko. Gogoratu beharra dago eraikinak 39 erabiltzaile dituela.
Aldaketa gehiago beste solairuetan
Lanen ondorioz, zirkulazio eta komunikazio espazioak berrantolatuko dituzte, gelei erosotasun eta pribatutasun handiagoa emateko.
Halaber, sukaldearen eta egongela-jangelaren arteko zuzeneko lotura berreskuratuko dute, eta igarobide atari berri bat sortuko dute. Handitzen den zatiaren sabaiari esker terraza berria sortuko dute lehenengo solairuan.
Horrez gain, lekuz aldatu edo egokitu behar diren espazioak berrantolatuko dituzte. Esaterako, ile apaindegia eta podologia, errehabilitazio gela, bulegoa eta bilera gela.
Horiek guztiak beheko solairuan bateratuko dituzte. Gainera, igogailu hidraulikoaren ordez igogailu mekanikoa instalatuko dute, eta beheko solairuko komunak irisgarritasun araudira egokituko dira.
Azkenik, eraikinaren eraginkortasun termikoko baldintzak hobetuko dituzte. Guztira, 300 m2-tan handituko dute azalera.