Amurrioko Emakumeon* Sareak deituta elkarretaratzea egin zuten atzo iluntzean Juan Urrutia enparantzan, herrian jazotako azken eraso matxista salatzeko. Dozenaka lagunek egin zuten bat deialdiarekin.
Indarkeria sexualaren azken kasuaren aurrean, Mugimendu Feministak "mezu bikoitza" helarazi nahi izan zuen atzoko mobilizazioan. Alde batetik, elkartasuna eta babesa adierazi zioten erasoa jasan duen pertsonari, bai eta bere inguruari. "Bakarrik ez dagoela" eta herriko feministen "aliantza" duela aldarrikatu zuen Emakumeon* Sareak.
Bestetik, mezu argia bota zioten erasotzaileari, eta berau babestu duen testuinguruari: "Aurrean izango gaituzue". "Eraso bakoitzaren aurrean erantzuteko prest eta antolatuta gaude, eta gero eta gehiago gara gertakari hauek salatzeko urratsa ematen dugunok. Ez gara besoak gurutzatuta geratuko", adierazi zuten irakurritako salaketa oharrean.
Egungo "jarrera konplizeak" alboratzeko eta jendarte antolaketa sexistari aurre egiteko neurriak mahaigainean jartzeko beharra defenditu zuen Mugimendu Feministak. "Autodefentsa feministarako" deia luzatu eta gisa horretako bizipenak jasan edo ezagutzen dituzten pertsonak Amurrioko Emakumeon* Sarearekin harremanetan jartzeko gonbita egin zuten: "Berriro diogu, ez zaudete bakarrik, ez gaude bakarrik!".
Sistematikoki jazotzen diren erasoen aurrean, posizionatzeko eta ardurak hartzeko beharra aldarrikatu zuten. "Konponbidea ez bazara arazoa zara. Aurrekoetan esan izan dugun bezala, denok dugulako erasotua izan den lagunen bat, baina inork ez dauka lagun erasotzailerik. Kontuek ez dute ematen".
Erailketa matxista Zarautzen
Aurretik Orozkon eta Aiaran egin bezala, urriaren 16an Zarautzen gertatutako erailketa matxista salatu zuten ere atzo arratsaldean Juan Urrutia plazan elkartutakoek. Gizonezko batek 47 urteko emakumea hil zuen; urtea hasi zenetik Euskal Herrian gertatutako seigarren erailketa da.
"Emakumeok* emakume* izateagatik erailtzen gaituzte eta errealitate gordin honi aurre egiteko urgentziazko mekanismoak eta erabakiak behar ditugu, hemen eta orain. Erakundeei dagokien ardura hartzeko exijitzen diegu eta haien pasibotasuna salatzen dugu", nabarmendu zuten feministek atzo arratsaldean.