Donald Trump Ameriketako Estatu Batuetako presidenteak proposatuko dio Nazio Batuetako Segurtasun Kontseiluari aitortu dezan Mendebaldeko Sahara lurralde marokoar gisa. Bihar izango da ekimena eta komunitate sahararra Amurrion mobilizatu zen, munduko beste hainbat tokitan bezala, euren lurraldearen burujabetza soilik onartuko dutela aldarrikatzeko.
Atzo sahararrek gaitzetsi zuten amerikarren proiektu politikoak (Frantzia, Espainia, Alemania eta Arabiar Emirerri Batuen babesarekin) suposatuko lukeela nazioarteko legea alde batera uztea eta automatikoki lurralde sahararra Marokori oparitzea.
"Saharako herriak urte luzez itxaron du Nazio Batuek antolatu behar zuten erreferenduma eta horrela jarraitzen dugu. Gure burujabetza baino ez dugu onartuko. Mendebaldeko Sahara ez da Marokorena, Espainiarena edota Frantziarena. Sahararrok ordezkari bakarra daukagu, Fronte Polisarioa, eta guri dagokigu erabakitzea zer egingo den gure etorkizunarekin eta bitarteko naturalekin", adierazi zuten atzo.
Halaber, gogoratu zuten 1991n egin behar zen erreferenduma gauzatu ez izanak egungo egoera ekarri duela: "2020an Maroko eta Fronte Polisarioaren arteko gerra berriro hasi zen eta horrela jarraitzen dugu".
Argazkiak: Amurrioko komunitate sahararra