Ondasun Higiezinen gaineko Zergaren Ordenantza Fiskalaren moldaketa onartu du Amurrioko udalbatzak. Hain zuzen ere, %12,5 inguruko igoera aurreikusi dute, hobariak sortzen dituzten errenta tarteetan.
Horrek esan nahi du Amurrioko herritar gehiagok eskuratu ahalko dituztela hobariak. Laguntza horiek zergen %99ra irits daitezke, errentaren eta bizikidetza-unitatea osatzen duten pertsonen kopuruaren arabera. “Egungo errealitate sozioekonomikora egokitzeko” urratsa dela adierazi du Udalak.
Tokiko erakundeak adierazi du udal zerbitzu publikoekin lotutako beste tasa batzuetan izango duela eragina neurriak, hala nola hondakinen bilketa eta tratamenduan, arte-eskoletan, gizarte- eta kultura-programetan edo adinekoentzako jantokian. Izan ere, esparru horiek errenta-maila berera lotuta daude askotan.
EH Bilduk, bere aldetik, nabarmendu du Udal Gobernuak talde subiranistarekin hartutako konpromisoetako bat dela hau, indarrean dagoen aurrekontu akordioan jasotakoa. “Fiskalitate justuago eta progresiboago” baten aldeko urratsa dela aldarrikatu du oposizioko taldeak, eta nabarmendu du moldaketak ahalbidetzen duela errenta baxuenak dituzten herritarrak zerga igoerengatik ez zigortzea.