Urteko asteburu bizienetakoa izango da honako hau Lezamako herritarrentzat, hainbat ekintza antolatu baitituzte jaiak ospatzeko, urtero bezala.
Larunbatean 11:00tan izango da lehenengo hitzordua, txirrinduzaleen gogokoena: ziklo-krosa. Ostean, bazkaria egingo dute 14:30ean, eta dantzaldia zein herri jolasak egongo dira gero.
Etxebarria aita-semeak ere bertan egongo dira, 18:30etik aurrera, herria trikiti eta pandero doinuez alaitzen. Gauean parrillada egingo dute pilotalekuan eta Muxutruk erromeriarekin eta DJ Varrorekin amaituko dute eguna.
Doako autobusa egongo da Amurriotik: 23:15ean aterako da Antzokitik eta 6:15ean itzuliko da Lezamatik. Kultur etxean eskuratu daitezke tiketak.
XIV. Mus Txapelketa izango da igandeko protagonista, 16:30ean irekiko dute izen ematea eta 17:00etan abiatuko da.
Asteartea izango da festen azken eguna: eguerdian Martin Deunaren omenezko meza egongo da eta ondoren zozketa egingo dute. 65 urtetik gorakoek elkarrekin bazkaltzeko aukera izango dute, eta briska txapelketa eta txokolatea egongo dira arratsaldean.