Astelehenetik aurrera egongo da funtzionamenduan Mendiko Eskolako sarreran dagoen elkartasun vending makina (Amurrioko Zero Zabor Hozkailua). Nahi dutenek janari tuperrak eskuratu ahal izango dituzte bertan, doan. Izan ere, ikastetxeko jantokian soberan dauden elikagai egokiak ontziratuko eta eskuragarri egongo dira.
Berez, ez dute edozein janari baliatuko eta tenperatura baldintza zorrotzak izango dituzte ontzien edukiek, bakteriak eta edozein arrisku ekiditeko. 64 gradutik behera egondako jakiak ez dituzte bideratuko eta makina baten bidez lau gradutara jaitsiko dute elikagaien tenperatura, bakterien agerpena ahalik eta gehien murrizteko.
Mendiko Eskolako proiektua
Elkartasun ekimena ez ezik, Rexcatering deituriko eskaintza honek 2030 Agendako helburuekin bat egiten du, soberakinak eta hondakinak ez sortzeko eta elikagaien xahuketa ekiditeko, CO2 isurketak ere murriztuta.
Ideia ikasleena izan zen eta ikastetxeko ama batek azaldu zuen Portugaleten Rexcatering proiektua zegoela. Amurrioko Udalaren finantzazioarekin, Fundación Residuos Cero Fundazioak bere teknologia eta jarduera ekarri du ikastetxera eta astelehenetik aurrera indarrean egongo da. Fundazioak aplikazioa eta teknologia prestatu du prozesu osoa kontrolpean izateko.
Amurriokoa lehen Rexcateringa izango da Araban. Bizkaiko, Gipuzkoako, Kataluniako eta Andorrako 44 ikastetxe eta adinekoen egoitzatan baliatzen da sistema hau jadanik.
Ikasleen parte hartze aktiboa
Mendiko Eskolako sukaldeko langileek elikagaiak ontziratuko badituzte ere (horretarako trebakuntza jaso dute), ikasleek eurek ere parte hartze erabakigarria izango dute. Euren esku egongo da tuperren etiketak jartzea (informazio guztiarekin: osagaiak, alergenoak, data, trazabilitatea...) eta motxila isotermikoetan makinara eramatea eta sartzea.
Proiektua etorkizunera begira ere sortu dute, gogoratu beharra baitago Mendiko Eskolaren aurrean nagusien eguneko egoitza irekiko dutela.