Hasi berri dituzte Amurrioko adinekoentzako foru egoitza handitzeko lanak, eta gaur bertan obrak bisitatzera bertaratu da Arabako Foru Aldundiko ordezkaritza bat. Bertan izan dira Ramiro Gonzalez Diputatu Nagusia eta Gorka Urtaran Gizarte Politiken Saileko Foru Diputatua, baita Txerra Molinuevo Amurrioko alkatea ere.
Hilabete honetan abiatutako lanek 300 metro koadroko espazio berria eskainiko diote egoitzari. Momentuz espazio berri horren zimentazioa egiteko beharrezko lur mugimenduak egin dituzte. Orotara 1,3 milioi eurotan zenbatetsi dituzte egoitza handitu eta berritzeko lanak.
1990. urtean inauguratu zen Amurrioko adinekoen egoitza eta, ordutik hona erreforma puntualak egin badira ere, azpiegitura zaharkituta dago. Bide horretan, foru gobernuak "Arabako gizarte baliabideen parke zabala hobetu eta modernizatzeko" egindako apustua azpimarratu du Ramiro Gonzalez Diputatu Nagusiak.
Egongela handitzeko lanak
Esku-hartzerik garrantzitsuena egoitzako egongela-jangelan egingo dute. Lanei esker, orain dutenaren espazio bikoitza izango dute etorkizunean egoitzako erabiltzaileek. Gainera, eraikineko beste soilairuetan dauden hainbat ekipamendu espazio berritura lekualdatuko dituzte: ile-apaindegia, farmazia eta errehabilitazio gela, esaterako. Espazioen berrantolaketari esker, banakako gela berri bat izango du egoitzak bigarren soilairuan, zerbitzuari plaza berri bat gehituz, 40 orotara.