Zaraobe Saskibaloi Taldeak entrenatzeko kamiseta bereziak sortu ditu Araba Euskaraz jaiari zabalpena emateko. Izan ere, aurten Amurrioko Aresketa Ikastolak antolatuko du ospakizuna eta kirol klubak zabalpena eman nahi dio.
Horretarako senior taldeari eta gazte taldeari egin dizkie entrenatzeko kamiseta bereziak, Araba Euskaraz herrian izango dela iragartzeko. Pankarta ere eraman zuten asteburuan Arrasatera.
Zuzendaritzak aipatu du bi talde horiei egin dizkiela propio biek jokatzen dutelako Arabatik kanpo. Seniorrek maila nazionaleko bigarren kategoria gorenera igo ziren aurreko denboraldian eta gazteek Bizkaian eta Gipuzkoan lehiatzen dira.
Gabonetako torneoa eta jarraitzaile figura
Horrez gain, klubak erronka jendetsua izango du Eguberritan. Urtero bezala Gabonetako Torneoa antolatuko du abenduaren 26tik 30era bitartean. Guztira 21 talde erakarriko dituzte, 300 jokalari baino gehiago bilduta eta goizetik gauera arte Bañueta Kiroldegia hartuko dute lagunarteko partidek.
Zaraobe STk gogoratu du torneoan zozketak egingo dituztela eta horietan parte hartzeko klubeko jarraitzaile egiteko aukera dago, 10 euroren truke.